SPAK ka lëshuar dje 18 urdhër-arreste me masën “burg”, një urdhër-arrest shtëpie dhe dy masa “detyrim paraqitje”, prej të cilave vetëm disa janë ekzekutuar deri më tani.
Ndër urdhër-arrestet ishte edhe ai për Sergej Hasanpapaj, i cili ka qenë i arrestuar në Belgjikë në vitin 2022 për vrasjen e Bledar Muçës.
Më 25 tetor, mediat spanjolle raportuan arrestimin e një 43-vjeçari shqiptar në aeroportin e Manises, Valencia, sapo mbërriti nga Tirana.
Sipas mediave spanjolle, ai ishte dënuar me burgim të përjetshëm për rolin e tij në dhënien e informacionit që çoi në një vrasje në Belgjikë në vitin 2022.
Marsel D. dyshohet se ka ofruar informacione që ndihmuan autorët e vrasjes së Bledar Muçës.
Aktualisht, ai ndodhet i burgosur në Spanjë, duke pritur vendimin për ekstradimin e tij të mundshëm drejt Belgjikës.
Po ashtu, mediat spanjolle raportojnë se një tjetër i dyshuar lidhur me këtë çështje vazhdon të jetë në burg në Belgjikë.
Ky person është Sergej Hasanpapaj, i cili u arrestua gjatë pranverës së vitit 2022 në Belgjikë dhe për të cilin SPAK lëshoi një urdhër-arrest të ri ditën e djeshme.
Ndërkohë, sipas mediave belge, një i afërm i Hasanpapajt është dënuar në Shqipëri në vitin 2019 për një tentativë vrasjeje ndaj Bledar Muçës dhe Florenc Çapjas.
Nga ana tjetër, Prokuroria Publike në Antwerp nuk ka dhënë ndonjë koment lidhur me arrestimin më të fundit në kuadër të hetimit për këtë vrasje.
