Bizneset janë padyshim çelësi për një ekonomi më të mirë dhe këtë gjë e ka shprehur së fundmi edhe Guvernatori i Bankës së Shqipërisë, Gent Sejko.
Sejko gjatë takimit përmbyllës së Shoqatës së Bankave, iu ka kërkuar të gjitha bankave të nivelit të dytë që të ndihmojnë bizneset dhe të rrisin kreditimin për to.
“Viti që po mbyllet, konfirmoi qëndrueshmërinë e sektorit bankar shqiptar. Ai mund të vlerësohet i veçantë për vetë faktin që sistemi përjetoi ndryshime strukturore të rëndësishme, të cilat priten të finalizohen në vitin që po hyjmë. Veprimtaria e sektorit vijoi të zgjerohej, duke mbetur e mirëkapitalizuar, likuide dhe me fitim. Megjithatë, përtej kësaj, vlerësoj se niveli i përgjithshëm i kreditimit të ekonomisë është ende larg potencialit dhe mundësitë për të zgjeruar kredidhënien janë të shumta. Mirëkuptoj deri diku faktin që në këtë fenomen ndërthuren probleme si nga ana e kërkesës së dobët, ashtu edhe nga një ofertë e kushtëzuar nga standardet e shtrënguara të kreditimit. Megjithatë, përtej faktorëve strukturorë, vlerësoj se duhet të reagojmë për të shmangur gjendjen stanjante në kreditimin e ekonomisë”, u shpreh Sejko.
Sipas Panorama, Sejko kërkoi që bankat të propozojnë masa konkrete për gjallërimin e ekonomisë. “Ritmi i rritjes ekonomike e ka të nevojshme gjetjen e mbështetjes në dinamikën e kreditimit bankar. Synim konstant mbetet nevoja për ta eksploruar tregun në vazhdimësi, për të identifikuar klientët potencialë, veçanërisht familjet dhe bizneset e vogla dhe më kryesorja për t’i ndihmuar ata në ndërtimin e një projekti të vlefshëm për financim. Kjo kërkon të konceptoni dhe ndërtoni strukturat, proceset dhe produktet e nevojshme, si edhe të planifikoni burimet e duhura financiare”, u shpreh Sejko.
