Shfrytëzimi pa kriter i mjedisit vazhdon të jetë një nga problematikat më të mëdha në vendin tonë.
Disa ditë më parë u publikuan disa pamje nga lumi Mat, në shtratin e të cilit, kompania “Salillari” po kryen punime, ku u panë qartë kamionët dhe ekskavatorët e kësaj kompanie.
Edhe gazeta “Reforma.com” e denoncoi ngjarjen, pasi duket edhe nga pamjet e publikuara që tokat bujqësore të kësaj zone rrezikojnë të përmbyten sërish në dimër për shkak të devijimit të rrjedhës së lumit.
Ky problem lidhet me gërryerjen e shtratit të lumit në mënyrë të pakontrolluar e në mënyrë të babëzitur nga kompani private që nuk u hyn një “gjemb në këmbë”.
Kjo pasi institucionet kanë zgjedhur të heshtin përballë këtij fenomeni abuziv që po i bëhet shtratit të lumit Mat.
Disa ditë më parë janë penalizuar disa kompani që shfrytëzonin inertet në shtratin e këtij lumi, ndërsa një tjetër kompani po masakron madje pranë urës duke rrezikuar dhe këmbët e saj.
Edhe pse rrezikojnë urën, marrja e interteve nga kjo kompani po gërryen dhe tokë bujqësore të fermerëve të zonës.
Sipas “Dosja.al”, eskavatorët nuk pushojnë as ditën dhe as natën, në një zonë turistike, siç është fshati Skuraj.
Institucionet dhe qeveria as nuk kanë ndërmend ta kontrollojnë këtë aktivitet të paligjshëm dhe të vënë para drejtësisë autorët që kanë shkaktuar këtë katastrofë ekologjike.
Një banor i zonës ka treguar se firma “Salillari” nuk ndalet në shfytëzimin pa kriter të inerteve duke dëmtuar shtratin e lumit, tokë bujqësore dhe imazhin e natyrës së mrekullueshme të fshatit turistik në Skuraj.
“Quhem Agustin Kulla. Këtu ka katër muaj që punojnë dhe marrin zhavorr pa kriter. Lumi Mat nuk preket.
Kam kërkuar nga Bashkia, kam bërë kërkesë pas kërkese, kam dalë dhe para mediave por nuk është bërë asgjë.
Kërkoj nga shteti shqiptar që të mbrojë tokën dhe jo të marrë zhavorrin kompania Salillari. Nuk është e lejueshme. Kjo është zonë e Mbrojtur.
As Ministria e Mjedisit nuk më ka kthyer përgjigje,”– shprehet banori i zonës.
Mesa duket të tjera interesa fshihen nga shteti jonë dhe këtyre kompanive që po shkatërrojnë pa kriter mjedisin shqiptar.
Kjo duket në mosreagimin dhe në mungesën e marrjes së masave ndaj personave dhe kompanive që po gërryejnë në mënyrë të babëzitur shtratet e lumenjve të Shqipërisë.
