Gjykata e Durrësit ka lënë të lirë me kusht ditën e sotme, Enertila Beqjan, e cila nëpërmjet fotos së “Facebook-ut”, i zhvati drejtorit të Postës së Manzës, Barush Ahmetit, 60 milion lekë.
Si foto profili ajo kishte vendosur aktoren e njohur nga Venezuela, “Elisabeth Gutierrez”.
Në 2018-ën, ajo u dënua me 3 vjet dhe 4 muaj burg për veprën penale të “Mashtrimit”, vendim të cilin e la në fuqi edhe Apeli.
Ajo kërkoi lirimin me kusht, me pretendimin se ka vuajtur mbi 2/3 e dënimit, shkruan “Panorama”.
Gjithashtu gjykatësi mori në administrim një dokument të lëshuar nga Instituti i Sigurimeve Shoqërore në Durrës, ku thuhej se nëna e të dënuarës është invalide dhe Enertila është fëmija i vetëm i familjes, që jeton në kushte tepër të vështira ekonomike.
E reja deklaronte dikur, se kishte pasur njohje me Barushin nëpërmjet rrjetit social “Facebook”, ndërsa gjatë seancës e ka mohuar këtë fakt.
Ajo është shprehur se 30-vjeçarin e kishte parë në postë, kur merrte lekët e kempit, ndërsa faqja në “Facebook” me emrin Enertila Beqaj, nuk administrohet prej saj.
“Nuk kam pasur kurrfarë komunikimi me atë. Jam e lidhur me një djalë që është jashtë shtetit. Unë në ‘Facebook’ kam foto profili me mamin tim. Nuk kam komunikuar kurrë me të në telefon”, tha 27- vjeçarja në Gjykatë.
E pandehura ka dhënë një version tjetër, nga ai që kishte treguar në polici. Ajo thotë se nuk ka lidhje me Barushin, dhe se është e lidhur me dikë tjetër.
“Në ‘Facebook’ kam emrin Enertila Beqja dhe si foto kam një timen me mamin. Unë s’e njoh Barushin, ç’punë kam me të? Bën punë si postier, sjell pensionin e mamit në shtëpi (kempin) ose shkojmë e marrim ne në Manzë. Në muajin qershor jemi zënë me Barushin se më ka mbajtur një muaj nga kempi i mamit. Vajta dhe u ankova për të në postë dhe në polici. Unë s’kam punë me Barushin. Unë jam e fejuar me Albano Stafën, jeton në Milano. S’e kemi bërë fejesën, por jam e zënë me të. S’më ka kërkuar akoma. Unë mendoja se isha shtatzënë, se më kishte dalë pozitiv testi i shtatzënisë. Unë kam faturat që kam blerë të gjitha mallrat vetë. S’kam fare pjesë me këtë punë. Kërkoj edhe mëshirë, edhe pafajësi. Kam mamanë e sëmurë dhe ajo nuk jeton dot pa mua”, u shpreh 27-vjeçarja.
Ndërkohë organi i akuzës, thekson se ka prova që gjatë periudhës kohore 2015-2017, Barushi dhe vajza kishin miqësi virtual, ku Enertila i kishte thënë drejtorit të Postës së ishte nga Manza, por jetonte në Milano.
Ajo gjithashtu i kishte kërkuar Barushit që t’i çonte tezes një palë kolltukë, por në fakt ishte shtëpia ku ajo jetonte me prindërit.
Më pas Barushi i ka dhuruar vajzës dy televizor plazmë, dekoder dixhitalbi, lavastovilje, sobë druri, pistë vrapi, bizhuteri ,iPhone6 dhe 7 plus, si dhe shuma të mëdha të hollash.
