Rrjeti kriminal në Qerekë, reagon Eurojust

Pas një operacioni të zhvilluar në Tiranë dhe rrethinat e saj, ku u zbulua një laborator kokaine, Eurojust ka reaguar sot përmes një raporti zyrtar.

Në deklaratën e Agjencisë së Bashkimit Evropian për Bashkëpunim në Drejtësinë Penale, theksohet se autoritetet shqiptare arrestuan dhjetë persona të dyshuar si pjesë e një rrjeti të trafikut të drogës, në një operacion të mbështetur nga Eurojust.

Një laborator i sofistikuar për përpunimin e kokainës u sekuestrua në Shqipëri.

Rrjeti kriminal, i cili përbëhej nga anëtarë të një grupi shqiptar të krimit të organizuar (OCG), merrej me transportimin e kokainës nga Amerika Latine përmes Italisë në Shqipëri, duke e shpërndarë më pas në disa vende evropiane.

Në vitin 2023, Prokuroria e Posaçme Shqiptare kundër Krimit të Organizuar (SPAK) nisi një hetim që zbuloi përfshirjen e këtij rrjeti në trafikun e gjerë të drogës, duke përdorur Shqipërinë si një qendër për shpërndarjen e saj në tregun evropian.

Laboratori i sekuestruar ishte i përfshirë në përpunimin dhe paketimin e drogës për shpërndarje në OCG të tjera në të gjithë Evropën.

Aktualisht, autoritetet po vlerësojnë volumin dhe vlerën totale të trafikut të drogës të këtij rrjeti.

Gjatë operacionit, përveç laboratorit, u sekuestruan:

– Rreth 50 tonë lëndë të parë për maskimin e lëndëve narkotike
– Mbi 6 kilogramë kokainë
– Pothuajse 90 kilogramë material të ngurtë për përzierjen e drogës dhe 50 kilogramë lëngje për përgatitjen e kokainës
– Pajisje laboratorike, duke përfshirë presa, aceton, epruveta qelqi, materiale kimike, mikrovalë dhe qese paketimi
– Mbi 50,000 euro cash në monedha të ndryshme
– Karta bankare, SIM karta dhe pajisje të ndryshme komunikimi
– Gjashtë automjete

Eurojust mbështeti SPAK-un dhe autoritetet në Reggio Calabria për zbatimin e kërkesave për Asistencë Juridike të Ndërsjellë mes Shqipërisë dhe Italisë.

Ky bashkëpunim u realizua përmes Tavolinës Kombëtare për Italinë dhe Prokurorisë Shqiptare të Ndërlidhjes pranë Eurojust në Hagë.

Shqipëria është një nga 12 vendet jashtë BE-së që ka një prokuror ndërlidhës me qendër në Eurojust.

Operacioni fundjavën e kaluar u krye nga dhe me kërkesë të:

Shqipëri: Prokuroria Speciale Kundër Krimit të Organizuar (SPAK)

Itali: Zyra e Prokurorit Publik të Reggio Calabria; Guardia di Finanza Reggio Calabria