Kryeministri i vendit Edi Rama, nuk ka qenë i pranishëm në mbledhjen onlin që organizoi Partia Socialiste ditën e sotme, pasi po zhvillon një takim 2-ditorë në Ankara së bashku me disa ministra. Ai ka publikuar së fundmi një foto në rrjetet sociale nga Turqia, ku shfaqet duke zbritur shkallët e avionit. Krafhas fotos Rama shkruan se e realizoi këtë vizitë në Ankara, për të shtuar bashkëpunimin dypalësh mes ministrive, për ecurinë e projekteve të përbashkëta. Rama thekson se këto projekte do të përfshinë sektorë të ndryshëm si teknologji digjitale, turizëm, farmaceutikë, energji, transport.
“Ankara – Vizitë dyditore për ecurinë e projekteve të bashkëpunimit dypalësh mes ministrive dhe kontaktet e organizuara me investitorë në teknologji digjitale, turizëm, farmaceutikë, energji, transport.”, ka shkruar në rrjetet sociale kryeministri Edi Rama.
Kujtojmë se Rama mungoi në mbledhjen e mbajtur sot nga Asambleja Kombëtare e PS, që u drejtua nga sekretari i përgjithshëm Taulant Balla. Gjithashtu katër vendime janë miratuar sot në Asamblenë e Partisë Socialiste, që lidhen me thirrjen e Kongresit të Jashtëzakonshëm më 12 qershor, analizën e zgjedhjeve të 25 prillit apo me zgjedhjet në strukturat vendore të PS. Një prej vendimeve lidhet me zhvillimin e analizës së rezultateve në zgjedhjet e përgjithshme të 25 Prillit 2021.
Analiza do të kalojë në tre faza përmes një komisioni të posaçëm. Procesi do të nisë në 15 Qershor 2021 deri në 15 Janar 2022 në çdo nivel të partisë.
