Pas një seance të jashtëzakonshme, që nisi në mesditë, Kuvendi i Kosovës ka votuar me 82 vota pro, 32 kundër dhe 2 abstenime për rrëzimin e “qeverisë Kurti”.
Ky mocion është inicuar nga Lidhja Demokratike e Kosovës dhe është përkrahur nga të gjitha partitë opozitare dhe minoritetet në Kuvendin e Kosovës.
Ndërkohë, Lëvizja Vetëvendosje është partia e vetme që ka votuar kundër rrëzimit të qeverisë të udhëhequr nga lideri i kësaj partie, Albin Kurti.
Po ashtu, kundër rrëzimit të qeverisë kanë qenë edhe 3 deputetë të Lidhjes Demokratike të Kosovës, si dhe kryeparlamentarja Vjosa Osmani.
Me këtë vendim, qeveria Kurti bëhet qeveria më jetëshkurtër në historinë e qeverive të Kosovës me vetëm 50 ditë punë.
Tashmë, presidenti i Kosovës me partinë që ka më shumë mandate do votojnë një kandidat të ri që do qëndrojë në krye të qeverisë, në të kundërt vendi shkon në zgjedhje të parakohëshme.
Kujtojmë se disa ditë më parë Kurti është përfshirë në një përplasje me LDK, pas shkarkimit të ministrit të Brendshëm Agim Veliu, të cilin e akuzoi se ka përhapur panik për gjendjen e krijuar në Kosovë pas goditjes nga COVID-19.
Menjëherë, LDK i ka dërguar ultimatum Kurtit, duke thënë se do të bëjë një “mocion mosbesimi” kundër qeveris, çka rrëzoi automatikisht Kurtin nga pushteti.
