Dy mjeke kanë dhënë një mesazh për shqiptarët nga spitali i Durrësit.
Ato u kanë bërë thirrje qytetarëve që të qëndrojnë në shtëpi, në këtë kohë kur COVID-19 ka infektuar 42 persona në Shqipëri.
Mjeket kanë treguar ambjentet se ku kryhen operacionet si dhe tubin, i cili shërben për intubimin e personave që nuk marrin dot frymë.
Mesazhi i tyre për shqiptarët është: ”Qëndroni në shtëpi që të mos përfundoni te ky tubi”.
Më tej mjeket kanë falenderuar të gjithë ata që i duartrokitën, gjest për të cilin thonë se i dha forcë.
“Unë së bashku me kolegen time kemi vendosur që t’ju përcjellim një mesazh në një formë më praktike. Ju flasim nga salla kirurgjikale e Traumës dhe ju tregojmë disa gjëra. Ky është shtrati ku kryen operacionet dhe këtu përfundojnë të gjithë ata që kanë probleme të rënda. Ky është një tub që shërben për t’u ardhur në ndihmë personave që nuk marrin dot frymë dhe intubohen. Ajo që dua t’ju them është: Qndroni në shtëpi! Qëndroni në shtëpi që të mos përfundoni tek ky tubi. Dje na dhatë shumë forcë me duartrokitjet tuaja, që të bëhemi më të përgjegjshëm. Një shprehje popullore thotë se njëra dorë ndihmon tjetrën, të dyja lajnë fytyrën. Njëra dorë jemi ne, tjetra jeni ju, ju lutem mund të bëjmë diçka që ta kalojmë sa më shpejt këtë situatë të rëndomtë që të gjithë të përqafohemi të shëndetshëm. Ju përshëndesim dhe Zoti qoftë me me, zoti qoftë me ju, zoti qoftë me të gjithë shqiptarët“, shprehet mjekja në video.
Aktualisht në Shqipëri numri i të prekurve nga koronavirusi ka shkuar në 42.
Nga këto 17 të prekur ndodhen te Infektivi, ku 3 prej tyre janë në terapi intensive.
Qytetet ku janë shënuar rastet janë Tirana, Durrësi, Elbasani, Fieri, Lushnja, Rrogozhina dhe Elbasani.
Për të parandaluar përhapjen e koronavirusit, qeveria ka ndërmarrë një sërë masash, duke filluar nga mbyllja e lokaleve, shkollave, ndërprerja e transportit urban, ndalimi i qarkullimit të makinave private.
Kryeministri Edi Rama u bëri thirrje spitaleve private ditën e djeshme, që të bashkëpunojnë në këtë situatë të vështirë, ose do të gjobiten me 5 milion lekë.
Masa administrative Rama paralajmëroi edhe për bizneset që rrisin çmimet.
