Ndërkohë që procesi i vettingut për shumë gjykatës po vijon, anëtari i Gjykatës së Lartë Shkëlzen Selimi denoncon pronaren e Top Channel Vjollca Hoxhën për ndërhyrje në procesin e Vettingut.
Sipas gjyqtarit Selimi, tashmë i shkarkuar nga detyra, Vjollca Hoxha, ka ndërhyrë tek anëtarët e komisionit të Vetingut, për të ndikuar që ai të mos konfirmohej në detyrë. Selimi pretendon se Vjollca ka ndërhyrë për shkak se ai kishte në dorë shqyrtimin e dosjes së saj për çështjen e aksioneve të Top Channel.
Vjollca Hoxha ka bërë një betejë të gjatë për të marrë 100 % në pronësi Top Channel, duke kërkuar në gjykatë që t’u marrë aksionet dy aksionerëve të tjerë. Gjyqtari thotë se për këtë arsye, ai është vënë në shënjestër të sulmeve nga televizioni i Vjollcës.
Denoncimi i gjyqtarit pasqyrohet në një vendim të Kolegjit të Posaçëm të Apelimit. Në vendim thuhet “Lidhur me shkakun tjetër i cili, sipas subjektit të rivlerësimit, e ka vendosur trupin gjykues të Komisionit në kushtet e cenimit të paanësisë, ka të bëjë me pretendimin se procesi i tij i rivlerësimit është vendosur në shërbim të një prej palëve ndërgjyqëse, në një proces ende në shqyrtim nga ana e subjektit të rivlerësimit, që i përket kërkesë-padisë së ngritur nga aksionarja V. H. e grupit mediatik, kundër aksionarëve të tjerë të tij.
Në ankimin e tij, subjekti i rivlerësimit pretendon se kjo media ka qenë e interesuar për moskonfirmimin e tij në detyrë dhe se ndikimin e saj për të arritur këtë qëllim e ka bërë si nëpërmjet transmetimit të kronikave të shumta denigruese për subjektin e rivlerësimit Shkëlzen Selimi, por edhe nëpërmjet ndërhyrjeve të drejtuesve të saj të lartë ekzekutivë te komisionerja relatore e trupit gjykues të Komisionit.
