Bllokohet miratimi i draft-konkluzioneve për zgjerimin e Bashkimit Europian në mbledhjen e ambasadorëve të shteteve anëtare.
Holanda dhe Franca kanë kërkuar që Shqipëria të trajtohet e ndarë nga Maqedonia e Veriut. Ndërsa Bullgaria ka vendosur të bllokojë negociatat për shtetin fqinj, kjo për shkak të përplasjeve lidhur me historinë dhe gjuhën.
Vendi ynë nuk ka arritur të plotësojë dy nga gjashtë parakushtet, përkatësisht ngritja e Gjykatës Kushtetuese dhe miratimi i ligjit “anti-shpifje”.
Italia u përpoq të zbuste tekstin e konkluzioneve për Shqipërinë, por kjo u refuzua. Përfundimet e arritura sot nga Këshilli i Ambasadorëve duhet të miratohen nga këshilli i ministrave të jashtëm dhe për çështjet evropiane të vendeve të BE-së.
Nisja e negociatave me Shqipërinë dhe Maqedoninë e Veriut mund të miratohet në mars 2021. Gjithashtu më herët u vendos shtyrja e Konferencës së parë Ndërqeveritare, e parashikuar të mbahej në dhjetor të këtij viti.
Bilanci i një viti i Komisionit Evropian
Një vit pas ardhjes në funksion të përbërjes së re të Komisionit Evropian nën udhëheqje të Ursula von der Layen, institucioni i numëron sukseset e tij, mes të cilave edhe zhbllokimin e negociatave me Shkupin dhe Tiranën.
“Në ditën e 67-të, Komisioni miratoi metodologji të re për negociatat qasëse me BE-në që t’i bëjë më kredibile, të parashikueshme dhe dinamike me udhëheqje më të mirë politike. Kjo ka hapur rrugë që Këshilli i Evropës t’i fillojë negociatat qasëse me Shqipërinë dhe me Maqedoninë e Veriut, për të çka draft kornizat negociese i janë dorëzuar këshillit nga ana e komisionit”, thuhet në prezantimin e komisionit për vitin e parë të mandatit të kryetares, von der Layen.
Komisioni Evropian thekson po ashtu se, ka qenë “tërësisht solidar” me vendet e Ballkanit Perëndimor gjatë kohës së krizës me Covid – 19.
“Kemi siguruar menjëherë mbështetje afatgjate dhe i kemi përfshirë në shumë iniciative që normal janë të rezervuara vetëm për vendet anëtare”, thuhet më tej.
Në mars të këtij viti, Këshilli i Evropës miratoi vendim me të cilën dha dritë të gjelbër për hapjen e negociatave të anëtarësimit të Maqedonisë së Veriut dhe Shqipërisë në Bashkimin Evropian. Ndërkohë, në korrik Komisioni Evropian i dorëzoi Këshillit të BE-së draft kornizën negociuese për dy vendet.
Këshilli i ministrave ishte paraparë që të miratojë kornizën negociuese në mbledhjen e 17 nëntorit, por kjo nuk ndodhi, pasi Bullgaria vendosi veto për kornizën e Maqedonisë së Veriut për shkak të kontesteve historike mes dy vendeve.
/GazetaReforma.com/
