Mëngjesi i të premtes është gdhirë me një situatë zjarresh, por jo në pyje… por në automjete. Plot 4 autoveturave u është vënë zjarri në tre qytete të ndryshme, Elbasan, Vlorë dhe Krujë gjatë natës.
Rreth orës 04:00 të kësaj të Premteje në lagjen 11 Nëntori në qytetin e Elbasanit janë djegur pjesërisht 2 automjete. Sipas burimeve nga vendngjarja janë djegur automjetet tip “Volvo” me targa “AA 123 OD”, në pronësi të shtetasit Daniel Duka.
Automjeti është dëmtuar në pjesën e përparme dhe automjeti tip “Ford Fokus” me targë “AA 993 BN”, në pronësi të shtetasit Aleksander Bragjeci.
Ky automjet është djegur në pjesën e pasme. Pas sinjalizimit të marrë shërbimi zjarrfikës ka ndërhyrë duke bërë të mundur fikjen e zjarrit, ndërsa policia ka siguruar pamje të kamerave të sigurisë në zonën ku ka ndodhur ngjarja, për të zbuluar autorët e saj, pasi dyshohet për zjarrvënie të qëllimshme.
Një tjetër automjet u dogj rreth mesnatës në qytetin e Vlorës. Ngjarja ndodhi në lagjen “Hajrro Çakerri” në Vlorë, e cila ka qenë në epiqendër e ngjarjeve kriminale në qytetin bregdetar muajt e fundit.
Mësohet se makina tip “Nissan Micra”, me targa “AA 091 NB” që u shkrumbua nga flakët ishte në pronësi të shefit të Paraburgimit në Vlorë, Feim Alisinani.
Por ende nuk ka asnjë konfirmim zyrtar nga policia e qytetit bregdetar.
Ngjarja dyshohet se është e qëllimshme, pasi fillimisht dyshohet se dy persona kanë thyer xhamin e mjetit dhe më pas është hedhur benzinë. Ende nuk dihen arsyet që kanë çuar autorët drejt këtij akti.
Tjetër zjarrvënie në automjet ka ndodhur këtë natë edhe në qytetin e Krujës, ku është djegur një makinë pas mesnate.
Mjeti në pronësi të shtetasit G.T, 20 vjeç është djegur rreth orës 00:30. Mësohet se makina ka marrë flakë në oborrin e banesës së të riut.
Ngjarja ka ndodhur në vendin e quajtur “Ura e Gjolës”. Grupi hetimor po punon për zbardhjen e ngjarjes dhe përcaktimin e shkakut të zjarrit.
/GazetaReforma.com/
