Mblidhet për herë të parë Komisioni i Posaçëm për Reformën Zgjedhore.
Të pranishëm në komision janë anëtarët nga mazhoranca dhe opozita e re, si dhe të gjithë ambasadorët në Shqipëri.Gjithashtu bëhet me dije se mbledhja ka si qëllim miratimin e ekspertëve pranë komisionit dhe miratimin e kërkesës për mbështetje nga OSBE.
Kujtojmë se Kuvendi ka ndryshuar formulën e Reformës Zgjedhore. Ky ndryshim vjen pas negociatave me deputetët e opozitës së re, duke përfshirë kështu në komision edhe këta të fundit. Mësohet se Komisioni i Reformës Zgjedhore nga 18 anëtarë që ishte më parë, do të bëhet me 10 anëtarë, ndërsa kryetar do të jetë Damian Gjiknuri.
Në fjalën e tij, kryetari Damian Gjiknuri ka pasur një ftesë të hapur për opozitën jo parlamentare, për të dërguar vëzhguesin e tyre në këtë Komision. Ai ka theksuar se opozita e ka derën e hapur për t’iu bashkuar kolegëve të tyre në çdo kohë që e mendon të arsyeshme.
“Uroj të krijojmë një klimë të mirë bashkëpunimi. Bashkë kemi mundur, kur ishim në opozitë, të bisedojmë, të gjejmë marrëveshjet e duhura dhe të kalojmë reforma konsensuale. Zgjedhjet këtë vit kanë përmirësime. Me kimën e mirë të bashkëpunimin do kemi mundësi të kemi produktin më të mirë. Kërkoj mbështetjen e institucioneve ndërkombëtare dhe atyre që janë këtu për të na mbështetur qoftë me një kontribut modest. OSBE e ka deklaruar se është e gatshme të ofrojë asistencë, ne e mirëpresim. Presim dhe donatorët e tjerë për bashkëpunim dhe mbështetje.” – tha Gjiknuri.
Nga ana tjetër, Rudina Hajdari vuri theksin te një sistem i ri zgjedhje, duke deklaruar se sistemi aktual është i dominuar nga anti-kushtetueshmëria.
“Ndaj opinion të ndryshëm nga Gjiknuri, por kjo nuk do të thotë që nuk do bashkëpunojmë, pasi jemi këtu për një arsye të vetme, ndryshimi i sistemit politik. Sistemi aktual është i dominuar nga anti-kushtetueshmëria, klasa politike nuk është e përfaqësuar nga njerëzit, por përfaqësohet në mënyrë të padrejtë në Kuvend. Shqiptarët janë të interesuar për këtë reformë. Kjo reformë kërkon vullnet të gjerë politik. Në këto tri dekada komisionet nuk kanë prodhuar reforma të mira. Duke marrë parasysh sfidën e madhe që kemi përpara, fakti që jemi ulur këtu tregon se ka një konsensus të gjerë për diskutim për ndryshimin aktual të sistemit.” – deklaroi Hajdari.
