Zëdhënësja dhe deputetja e Partisë Demokratike, Ina Zhupa me anë të një postimi në rrjetet sociale ka denoncuar zhvillimin e mësimit në ambientet e një lokali dasmash në Babicë të Vlorës.
Në videon që ka publikuar në rrjetet sociale, ku shihen fëmijë që zhvillojnë mësim në ambientet e lokalit, ajo ka shkruar se kjo është fytyra e vërtetë e qeverisë së Edi Ramës, ndërsa ka akuzuar ministren e Arsimit, Evis Kushi se e ka mohuar ditën e sotme në Komisionin e Edukimit këtë fakt. Më tej Zhupa ka shtuar se qeveria dhe Ministria e Arsimit nuk japin zgjidhje për këtë fakt por ofrojnë vetëm gënjeshtra.
“Mësimi ne lokal dasmash nuk është montazh. Është fytyra e qeverise se Ramës me shkollat dhe arsimin në vend. Ministrja e mohon, Petro ulëret si kapter për ta mbrojtur dhe mendon si mund të intimidoj opoziten! Ja video faktike e mësimit në lokal në Babice të Vlorës që Ministrja e Arsimit e mohoi ne komision kur une ja solla si fakt. Nuk japin zgjidhje por ofrojnë gënjeshtra”- shkruan Ina Zhupa.
Sjellim në vëmendje se ditën e sotme u zhvillua Komisioni i Edukimit dhe ministrja Kushi u shpreh se janë përgatitur skenarët nëse do të ketë përkeqësim të situatës me koronavirus në vendin tonë. Në vijim të kësaj, Kushi tha se këtë vit janë duke hartuar një vendim që të kenë 500 kuota shtesë për zëvendësimin e mësuesve në rast të skenarit më të keq.
