Pak ditë më parë u raportua një ngjarje shqetësuese në zonën e kullotave në Llogara, ku 20 kuaj u sulmuan me armë zjarri dhe disa prej tyre mbetën rëndë të plagosur.
Megjithëse ekzistojnë prova të qarta dhe pamje filmike që dokumentojnë gjendjen e kafshëve dhe vendin e ngjarjes, përfshirë kapsolla dhe gjurmë të tjera pranë kuajve, deri tani asnjë autoritet nuk ka shkuar në vendin e ngjarjes për verifikim të plotë.
Burime pranë zonës bëjnë me dije se autori i dyshuar, me inicialet S.M., ka lidhje me strukturat e policisë, çka ka bërë që ndaj tij të fillojë vetëm një procedim penal. 55-vjeçari njihet në zonën e Dukatit për konfliktet e përsëritura me barinjtë e tjerë lidhur me ujin dhe kullotat, ndërsa shkaku i ngjarjes së fundit mendohet të ketë qenë pikërisht uji që pinë kuajt.
Ai dyshohet se ka dëmtuar lerën, vendi ku strehohen kuajt, me qëllim që t’i largojë duke u mohuar uji, madje duke i vrarë ato.
Barinjtë e zonës shprehin dyshime se pas kësaj ngjarjeje fshihet një person me lidhje në polici, prandaj autoritetet po tentojnë të shmangin hetimet e duhura, pavarësisht dëshmive për kuaj të ngordhur, të plagosur dhe të zhdukur.
Ata paralajmërojnë se nëse rasti nuk trajtohet me seriozitet, do të bëhen publike pamje të rënda që tregojnë momentet pas sulmit, kufomat e kafshëve dhe vendndodhjet e sakta të incidenteve.
