Janë konfirmuar dy raste të reja me Covid-19 këtë mbrëmje në Elbasan. Burime bëjnë me dije se behet fjalë për një burrë dhe një grua rreth 50 vjeç.
Gjithashtu mësohet se dy rastet janë përcaktuar gjatë ekzaminimit të mushkërive më skaner. Dyshimet e para janë që dy rastet e reja të jenë infektuar në Spitalin e Elbasanit.
Si pasojë e gjendjes së rënduar të frymëmarrjes, një prej të infektuarve u dërgua drejt spitalit infektiv.Drejt Infektivit është dërguar një nga personat që u konfirmua në mbrëmje në Memaliaj si dhe një tjetër i konfirmuar më herët gjatë ditës.
Kujtojmë se Ministria e Shëndetësisë ka dhënë shifra rekord ditën e sotme, teksa bëri përditësimin e të dhënave. Gjatë 24 orëve të fundit janë kryer 420 testime për të dyshuar të prekur me Covid-19, nga të cilat janë konfirmuar 90 raste pozitive. Shpërndarja gjeografike e rasteve është si vijon: 36 raste në Tiranë, 15 në Durrës, 11 në Vlorë, nga 8 raste në Kukës, Krujë, 4 në Kurbin, 3 në Elbasan, 2 në Lushnje, nga 1 rast në Lezhë, Kamëz, Dibër.
Po ashtu, informohet se dy qytetarë nuk e kanë fituar dot betejën me virusin, një 81 vjeçar nga Shkodra dhe një 63 vjeçar nga Elbasani, të shtruar prej disa ditësh në spitalin Infektiv në gjendje të rënduar, duke e çuar në 85 numrin e viktimave në vendin tonë.