Makina me të cilën udhëtonte prokurori Arjan Ndoja ditën kur ndodhi atentati ishte në pronësi të dikujt tjetër.
Bëhet fjalë për Fadil Çallikun nga fshati Xhafzotaj i Durrësit.
Ky i fundit është pronar i një shoqërie taksish në Durrës, shkruan “Shqiptarja.com”.
Sipas prokurorisë, ky automjet përdorej edhe nga bashkëshortja e Arjan Ndojës.
Çalliku është marrë në pyetje nga Krimet e Rënda, lidhur me arsyet se përse ia kishte lënë makinën prokurorit .
Mësohet se biznesmeni ka rrëfyer përpara hetuesve, se kishte njohje me Ndojën dhe Muharremin.
Kujtojmë këtu se 1 javë më parë, makina ku ndodhej prokurori Arjan Ndoja, Landi Muharremi dhe shoferi Andi Maloku, u qëllua me breshëri armësh në Shkozet të Durrësit.
Si pasojë e të shtënave, Muharremi dhe Ndoja u plagosën dhe janë jashtë rrezikut për jetën.
Ndërkohë Maloku ndërroi jetë ditën e djeshme në spital, pasi plumbat i kishin prekur mushkrin dhe shtyllën kurrizore.
