Çdo ditë e më shumë janë duke u zbuluar aferat korruptive që janë bërë gjatë drejtimit të disa institucioneve, por mesa duket këtë herë ka qenë radha e ish- kreut të KQZ-së, Denar Biba.
Biba gjendet sot në syrin e Prokurorisë së Tiranës për firmën e dhënë në 20 tendera të cilët i kanë kushtuar shtetit miliona lekë.
Gjithçka ka dal në pah pas autiditmit, ku u vunë re 4 procedura tenderimi për të cilat ka dyshime se i kanë shkaktuar shtetit një dëm prej 160 milionë lekësh.
Është një material i plotë, i firmosur nga vet Kontrolli i Lartë i Shtetit, i cili jep fakte rreth kësaj ngjarjeje dhe ia ka lënë në dorë prokurorisë që të ndërmarrë procedurat e duhura.
Në këto materiale kallëzuese, bëhet fjalë për 12 procedura tenderimi gjatë vitit 2016 dhe 8 te tjera në vitin 2017 që mbajnë firmën e Denar Bibës.
Mirëpo çudia nuk qëndron këtu, por në faktin se ende nuk ka një vendimmarrje nga ana e prokurorisë për sa i përket çështjes, gjë që do të thotë se mbetet ende në kufijtë e dyshimeve dhe e njëjta gjë ndodh edhe me KLSH-në.
Ende nuk ka pasur një arsye bindëse se përse KLSH nuk e ka bërë publik kallëzimin dhe raportin final të auditimit? Ku qëndron e fshehta dhe pse nuk janë marrë ende masa duke marrë parasysh që kallëzimi në prokurori ka shkuar që në nëntor të vitit të kaluar?
Pas gjithë pyetjeve tashmë pa përgjigje një gjë është e sigurt, fshehja e raportit është duke e favorizuar Bibën në mënyrë të drejtpërdrejtë.
Duket se Bibës i “ka shkuar treni në stacion” dhe për këtë nuk është duke shprehur as shqetësimin më të vogël.
Mirëpo nuk është hera e parë që Biba përfshihet në hetime dhe kjo është e vështirë që të hiqet nga vëmendja.
Biba është bërë pjesë e një audiopërgjimi, një bisede të ndodhur mes tij dhe gjyqtarit shqiptar të Strasburgut, Ledio Bianku, i cili ishte duke u shantazhuar nga ish-kreu i KQZ-së. Përgjimi flet mbi proceset gjyqësore që ka qeveria shqiptare për pronat në Strasburg.
Biba është bërë i njohur për një shprehje të përdorur “A të ndalon më ky tren në stacion? Të ngelesh pa punë dhe ç’ të vajti sakrifica? Njeriu bën kompromise në jetë”
Pra Biba përpiqet që të bind gjyqtarin shqiptar në Strasburg, duke i folur për punë, sakrifica dhe kompromise në emër kjo të Engjëll Agaçit, Sekretarit të Përgjithshëm të Kryeministrit.
Megjithatë dhe në atë kohë nuk ka pasur një vendim të qartë të prokurorisë rreth audiopërgjimit, por ka vazhduar të zvarritet ashtu si edhe shumë ngjarje të tjera.
