Hashim Thaçi dënohet me 25 vite burg për krime lufte, shpallet fajtor për vrasje, torturë, trajtim mizor dhe ndalim të paligjshëm; i pafajshëm për krime kundër njerëzimit

Ish-presidenti i Kosovës, Hashim Thaçi, është dënuar me 25 vite burg nga Dhomat e Specializuara të Kosovës në Hagë, pasi trupi gjykues e shpalli fajtor për krime lufte.

Gjatë shpalljes së aktgjykimit të shkallës së parë këtë të mërkurë, gjykata e gjeti Thaçin penalisht përgjegjës për krime që përfshijnë vrasje, torturë, trajtim mizor, si dhe arrestim dhe ndalim të paligjshëm, të kryera gjatë luftës në Kosovë.

Në leximin e arsyetimit, trupi gjykues u ndal edhe te roli i ish-presidentit të Kosovës dhe rrethanat që gjykata i konsideroi rënduese. Sipas trupit gjykues, Thaçi kishte përdorur pushtetin dhe autoritetin e tij në kryerjen e krimeve për të cilat u shpall fajtor.

Nga ana tjetër, Thaçi është shpallur i pafajshëm për akuzat për krime kundër njerëzimit.

Për këtë pjesë të çështjes, trupi gjykues konstatoi se Zyra e Prokurorit të Specializuar nuk arriti të provonte ekzistencën e një sulmi të përhapur kundër një popullate civile, kusht i nevojshëm për cilësimin e veprave si krime kundër njerëzimit.

“Lidhur me ekzistencën e një sulmi të përhapur kundër popullatës civile si kusht për krime kundër njerëzimit, Trupi gjykues konstatoi se ZPS-ja nuk ka arritur të vërtetojë se ishte kryer ky sulm i përhapur gjerësisht kundër popullatës civile. Trupi gjykues konstaton se akuzat nuk mund të cilësohen si krime ndaj njerëzimit. Nuk përmbushen kriteret e përgjithshme në lidhje me këto krime”, deklaroi kryetari i trupit gjykues.

Dhomat e Specializuara po shpallin sot, më 16 shtator 2026, aktgjykimin e shkallës së parë në procesin ndaj katër ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, të cilët janë gjykuar për akuza për krime lufte dhe krime kundër njerëzimit.