Reperi Kleviol Ahmeti, i njohur si “Cllevio”, është paraqitur ditën e sotme në Gjykatën e Posaçme, ku pritet të dëshmojë në procesin gjyqësor ndaj Laert Haxhiut.
Sipas raportimeve, Ahmeti është thirrur si dëshmitar në këtë proces, i cili lidhet edhe me episodin e vendosjes së tritolit në bizneset e reperit Rigels Rajku, i njohur si Noizy.
Më herët në GJKKO u paraqit edhe vetë Noizy, së bashku me babain e tij, Bashkim Rajku, po ashtu në kuadër të dëshmive për çështjen.
Emri i Cllevios është përmendur në dosje pas dëshmisë së të penduarit të drejtësisë, Artan Tafani. Ky i fundit ka deklaruar se vendosja e tritolit në bizneset e Noizyt ishte urdhëruar nga Laert Haxhiu, pas dhunimit të Kleviol Ahmetit, mik i Haxhiut.
Procesi ndaj Laert Haxhiut vijon në Gjykatën e Posaçme, ndërsa dëshmitë e personazheve të njohur të showbiz-it kanë rikthyer vëmendjen te një nga episodet më të bujshme të dosjes.
