Këshilli Drejtues i Radio Televizionit Shqiptar (RTSH) ka skualifikuar në mënyrë të paprecedentë tetë kandidatë nga gara për Drejtor të Përgjithshëm të RTSH-së, gjatë një mbledhjeje të mbajtur të hënën në mesditë.
Mes të skualifikuarve është edhe gazetari i njohur Eni Vasili, ndërkohë që janë kualifikuar vetëm dy zyrtarë aktualë të RTSH-së, drejtoresha e komanduar Aurora Polo dhe drejtori i RTSH-së në Shkodër, Jetmir Shpuza.
Po ashtu, janë skualifikuar edhe kandidatë të tjerë si Laureta Roshi, Kliton Rama, Enrik Mehmeti dhe Harrilla Koçi. Votimi ka shkaktuar polemika pasi nuk ka pasur një diskutim të hapur për kriteret e plotësuara nga kandidatët, gjë që sipas juristëve e minon procesin, duke lejuar që të votohet kandidati me njohuri të kufizuara pa verifikimin e plotë të CV-së së tij.
Në mbledhje, gjithashtu, ka pasur një shkelje të procedurave, pasi votimi është realizuar pa u diskutuar kriteret dhe është lejuar që anëtari i Këshillit Drejtues, Mevlan Shanaj, i cili ndodhet në Vietnam, të votojë online, duke cenuar fshehtësinë e votës.
Kryetarja demokrate e Komisionit të Medias, Ina Zhupa, ka reaguar duke e quajtur këtë veprim “çmenduri” dhe ka theksuar se skualifikimi i tetë kandidatëve që plotësojnë kriteret ligjore është një shkelje e ligjit, pasi nuk ekziston një rregull i tillë në ligj për të skualifikuar ata që plotësojnë kriteret.
