Presidenti turk, Recep Tayyip Erdogan mbështet integritetin territorial të Ukrainës. Ai bëri thirrje për kthimin e rajonit të Krimesë, të cilin Rusia e ka në pronësi që nga viti 2014. Përmes një video-mesazhi drejtuar Samitit të Liderëve të Platforma e Krimesë, presidenti turk, nënvizoi se kthimi i Krimesë në Ukrainë është një kërkesë e së drejtës ndërkombëtare.
“Mbështetja jonë për integritetin territorial, sovranitetin dhe pavarësinë e Ukrainës është e palëkundur. Kthimi i Krimesë në Ukrainë është një kërkesë e ligjit ndërkombëtar”, tha Erdogan, duke konfirmuar edhe një herë qëndrimin e Turqisë kundër aneksimit të Krimesë nga Rusia në 2014.
Erdogan iu referua gjithashtu dhimbjes që pësuan tatarët e Krimesë, vuajtjet e të cilëve vazhdojnë për tetë dekada.
Presidenti turk falënderoi gjithashtu presidentin ukrainas Volodymyr Zelensky dhe udhëheqësin e tatarëve të Krimesë, Mustafa Abdulcemil Kirimoglu për organizimin e samitit, i cili shënon 80 vjetorin e dëbimit të tatarëve të Krimesë.
Erdogan theksoi se Turqia nuk e kishte njohur kurrë aneksimin e Krimesë, për të cilën ai tha se kishte përkeqësuar gjendjen e banorëve të rajonit dhe nënvizoi të drejtën e tatarëve të Krimesë për të jetuar “të lirë, të sigurt dhe në paqe në atdheun e tyre”.
Në përfundim të fjalës së tij, Erdogan shprehu dëshirën për t’i dhënë fund luftës në Ukrainë përmes një paqeje të drejtë dhe të qëndrueshme, të bazuar në integritetin territorial dhe pavarësinë e vendit.
