Aleksandër Petanaj, 26 vjeç humbi jetën mbrëmjen e djeshme pasi u godit për vdekje me thikë nga një 15-vjeçar.
Ditën e sotme, familjarët e Aleksandrit kanë folur në lidhje me ngjarjen e rëndë.
Ata kanë treguar se viktima dhe autori ishin konfliktuar dy ditë më parë.
Sipas tyre, mbrëmë dy makina i kanë prerë rrugën 26-vjeçarit në Pyllin e Sodës, ku gjatë një sherri Gabriel Tartaraj e vrau me thikë në zemër.
Ata kanë deklaruar më tej se vrasësi ka qenë shok klase me vëllain e Aleksandrit.
Djali i xhaxhait të të riut të vrarë, tregon se vëllai më i vogël i Aleksandrit, ishte zënë me disa adoleshentë të tjerë, dhe kjo duket se është bërë shkak për konfliktin fatal të ndodhur mbrëmjen e djeshme.
“Aleksandri po kthehej natën nga Vlora me bicikletë. Kishte qenë në punë në mobileri. Në pyll të Sodës i kanë bërë pritë.
Kanë qenë rreth 10-15 vetë me dy makina.
Pasi e kanë sharë dhe goditur disa herë e kanë qëlluar me thikë. Ai që e qëlloi është shok klase me vëllain e Aleksandrit.
Janë zënë edhe më parë, por gjëra fëmijësh.
Ndoshta kanë dashur ta trembin, nuk e dimë. Jemi në një lagje me atë që është arrestuar, Gabrielin.
Por me Gabrielin kanë qenë edhe djem të tjerë, të rritur, më makina.
Ne nuk e lëmë me kaq. Na iku djali. Aleksandri nuk ngacmonte njeri, punonte gjithë ditën në mobilieri.
Nuk di ctë them, nuk e besoj. Djali nuk është kap ndonjëherë me njeri.
Kështu është shprehur djali i xhaxhait të viktimës për “FaxNews”.
Kujtojmë se 26-vjeçari Petanaj u dërgua pas mesnate në spitalin e Vlorës në gjendje të rëndë për jetën, dhe më pas nuk mundi të mbijetonte, ndërsa për ngjarjen u arrestua një 15-vjeçar.
