Ditën e djeshme u përhap me shpejtësi lajmi se Coronavirusi mund të kishte mbërritur në Shqipëri, por i menjëhershëm ishte reagimi i Institutit të Shëndetit Publik që qetësoi qytetarët duke konfirmuar se nuk ka asnjë të prekur në vendin tonë.
Ditën e sotme, kryeinspektorja e Inspektoriatit Shëndetësor në Tiranë, Areti Beruka ka theksuar edhe një herë se është caktuar një strukturë spitalore e cila do të përdoret si një vend për karantinë, por nuk do të jetë spitali i Kavajës, sikundër është përfolur.
Nga ana tjetër, ajo nuk dha detaje në lidhje me ambjentin ku është ngritur karantina.
“Unë në dijeninë time di që është një strukturë spitalore, nuk e di që është caktuar Kavaja. Nuk ka nevojë të bëhet politikë me këto emërime. Është një strukturë spitalore dhe përderisa ne flasim nuk ka asnjë rast nuk mund të them emër. Karantina është një vend që izolohen pacientë të shëndoshë të cilët marrin shërbimin e duhur. Nëse kemi një person që identifikohet personat që kanë pasur një kontakt të tillë ka dhe rastin kur vetë personi mund të karantizohet”, tha Beruka.
Beruka tha se në orët e fundit janë verifikuar dhe analizuar 7 raste të dyshuar me Coronavirus, ku analizat kanë dalë negative për gjashtë prej të tyre, ndërkohë një vijon të jetë akoma në proces verifikimi.
Alarmi në vendin tonë u ngrit pasi Covid-19 goditi Italinë, ku janë shkaktuar deri më tani 7 viktima dhe mbi 230 të infektuar.
Nga ana tjetër po përhapet lajmi se është infektuar edhe shqiptarja e parë në Itali dhe njoftimin e ka dhënë e ëma në Facebook, megjithatë nuk ka ende burime zyrtare që ta konfirmojnë atë.
Një shqiptare e infektuar nga Coronavirusi në Itali? E ëma e viktimës jep lajmin në Facebook
