Kryeministri Edi Rama vlerësoi me medalje, Luan Kapajn, zjarrfikësin nga Vlora, për kontributin e tij në operacionet e shpëtimit, pas tërmetit të 26 nëntorit.
Kapaj ishte një nga zjarrfikësit që rrezikoi jetën e tij, duke u futur poshtë rrënojave.
Në aktivitet ishin të pranishëm edhe qytetarët e shpëtuar prej tij.
Në fjalën e tij, Luani tha se është krenar për dy qytetarët që sot marrin ajrin e kësaj toke dhe shikojnë dritën e këtij dielli.
Ai zotua se do t’i shërbejë popullit të tij, deri në momentet e fundit të jetës.
“Më shumë sesa krenar kjo medalje mua më bën krenar për dy qytetarët e mi që sot janë bashkë me ne, marrin ajrin e kësaj toke dhe shikojnë dritën e këtij dielli. Unë do t’i shërbëj popullit tim deri në momentin e fundit të jetës time”, tha Luani.
Kujtojmë këtu se tërmeti i 26 nëntorit la pas 51 viktima dhe qindra të plagosur.
Gjithashtu dëmi ekonomik ishte shumë i madh, pasi mijëra qytetarë humbën banesat e tyre.
