Rreth dy vite më parë, policia shqiptare zbuloi një rrjet terrorist të drejtuar nga regjimi iranian i njësisë së forcave revolucionare “QUIDS” që kishte synim kryerjen e sulmeve ndaj opozitës iraniane MEK( refugjatë muxhahedinë të strehuar në Shqipëri).
Tre shtetasit iranianë, F. Z., S.M., dhe S.G. u ndaluan nga Shërbimi Informativ Shtetëror dhe njësia e anti-terrorit në Policinë e Shtetit.
Momentin e ndalimit ata ishin duke bërë foto dhe u thanë oficerëve të anti-terrorit se ishin gazetarë dhe kishin ardhur me ftesë të Kryegjyshatës Botërore Bektashiane.
Këto filmime sipas tre shtetasve iranianë ishin porositur nga një televizion turk, por nga hetimet e Krimeve të Rënda dhe prokurorit Beçi ka rezultuar e pavërtetë.
Pas ndalimit dhe marrjes në pyetje ata u lanë të lirë, por u mbajtën nën vëzhgim duke sjellë zbulimin e rrjetit.
Nëntë muaj pas kësaj ngjarje, Shqipëria dëboi ambasadorin e Iranit nga Tirana.
Së fundmi, lidhur me këtë ngjarje janë zbardhur të dhëna të tjera.
Në dosjen e lexuar nga Report Tv rezulton se në kamerat dhe aparatet fotografikë të këtij grupi kishte pamje të institucioneve shqiptare, kampit të opozitës iraniane strehuar në Manzë të Durrësit, qendrave tregtare dhe disa selive fetare në vend, filmime të cilat janë asgjësuar.
Hetimet kanë zbuluar se ky grup qëllimin real të vizitës së tij në Shqipëri ka pasur përgatitjen e terrenit për sulme terroriste dhe objektiv ka qenë eliminimi fizik i kreut të Bektashinjve Baba Mondi, dhe goditja e disa prej opozitarëve të MEK që janë strehuar në Shqipëri.
Po ashtu,hetimi i autoriteteve shqiptare zbuloi dhe disa lidhje të shqiptarëve me strukturat e Shërbimit Sekret në Iran, persona të cilët prej disa kohësh mbahen në monitorim jo vetëm për lëvizjet e tyre, por edhe për transaksionet bankare.
Fatmirësisht, policia arriti të godiste në kohë strukturën, që kishte përgatitur sulme terroriste.
Kjo celulë drejtohej nga operativi i Forcave QUDS, i njohur si PEYMAN , rezident i përhershëm në Iran.
Ai menaxhonte në distancë një numër operativësh në Shqipëri dhe në vende të tjera në Evropën Qendrore dhe Perëndimore.
