Kryeministri Edi Rama deklaroi nga konferenca për mediat me Federica Mogherinin se Shqipëria i ka kryer detyrat e shtëpisë dhe meriton hapjen e negociatave.
Rama ka informuar publikun për diskutimin që pati në takimin me përfaqësuesen e lartë të BE-së.
Pas takimit në Kryeministri, Rama dhe Mogerini i janë drejtuar foltores ku në një konferencë për shtyp, kryeministri tha se kryefjalë e diskutimeve me zyrtaren e lartë të BE-së ishte çelja zyrtare e negociatave për anëtarësim.
Rama tha se qeveria i ka kryer detyrat dhe është në pritje të raportit përfundimtar të KE-së, por shtoi se “gjykimi final” do të varet nga rrethana specifike në vetë vendet e BE-së, duke nënkuptuar frymën në rritje të popullistëve, anti-estabishment dhe anti-BE.
Pjesë nga fjala e Ramës:
Pata mundësinë të kem një takim dypalësh me përfaqësuesen e lartë të KE-së, të cilën dua ta falenderoj për kohën, vëmendjen dhe mbështetjen e vazhdueshme që i ka dhënë Shqipërisë në procesin e integrimit Europian. Folëm për tërësinë e reformave të ndërmarra, për pritshmëritë tona në vigjilie të daljes së raportit të Kongresit Europian, si dhe për ecurinë e mëtejshme në avancimin e reformave.
Nuk është sekret që ne presim vetëm një përgjigje, nga komisioni Europian, pra përgjigjen se i kemi kryer plotësisht detyrat e shtëpisë dhe meritojmë çeljen e negociatave për anëtarësim. Natyrisht këtë pritshmëri e kemi jo sepse dikusht duhet të na dhurojë diçka, por i kemi kryer dhe flasim me rezultate. Nuk do të marr kohë të bëj një listë me prioritetet përkatëse, as duke nënvizuar ecurinë e reformës në drejtësi, me rezultate të prekshme. Por dua ta nënvizoj edhe njëherë atë që i shpreha përfaqësueses së lartë të BE, se ne jemi të vetëdijshëm që gjykimi final do të varet nga rrethanat specifike në vetë vendet anëtare. Besojmë shumë që është koha për t’i dhënë fund një përpjekje për një fazë siç është ajo e përgatitjes dhe për t’i filluar zyrtarisht negociatat. Është guri që i mungon këtij themeli për të vazhduar rrugën tonë europiane. Diskutuam edhe pr samitin e Berlinit, edhe për sfidat e bashkëpunimit rajonal, edhe për dialogun Kosovës-Serbi.
