Në zgjedhjet parlamentare të 9 shkurtit, pjesëmarrja ishte dukshëm më e ulët sesa në zgjedhjet e vitit 2021.
Këto zgjedhje u zhvilluan në një atmosferë të qetë, pa incidente, dhe me mbi dy milionë qytetarë që kishin të drejtë vote.
Sipas Komisionit Qendror të Zgjedhjeve, rreth 790 mijë qytetarë votuan, duke e çuar pjesëmarrjen në pak mbi 40%, ndërsa në zgjedhjet e vitit 2021 pjesëmarrja ishte 48%.
Numërimi i votave është ende në proces dhe rezultatet paraprake priten së shpejti.
Në zgjedhje morën pjesë gjithsej 28 subjekte politike dhe një kandidat i pavarur, ndërsa katër kryetarët e partive më të mëdha garuan për postin e kryeministrit, Albin Kurti nga Lëvizja Vetëvendosje, Bedri Hamza nga PDK, Lumir Abdixhiku nga LDK dhe Ramush Haradinaj nga koalicioni AAK-Nisma.
Zgjedhjet u zhvilluan në mbi 940 qendra votimi dhe ishin mbikëqyrur nga më shumë se 100 dërguar ndërkombëtarë, duke përfshirë vëzhgues nga Bashkimi Evropian dhe Këshilli i Evropës.
Zgjedhje u mbajtën edhe në pjesën veriore të Kosovës, ku pjesëmarrja ishte pak më e lartë sesa në pjesët tjera të vendit.
Në parlamentin e Kosovës, dhjetë vende janë të rezervuara për partitë e komunitetit serb, dhe dhjetë të tjera për komunitetet e tjera pakicë. Njohësit e situatës politike vlerësuan se në këto zgjedhje pati pluralizëm më të madh, sidomos ndër komunitetin serb në Kosovë.
Zgjedhjet e 9 shkurtit ishin të nëntat që nga përfundimi i luftës dhe përbënin një sfidë për kryeministrin Albin Kurti, i cili kishte fituar bindshëm në zgjedhjet e vitit 2021.
Kjo ishte hera e parë që Kuvendi i Kosovës përmbushi mandatin katërvjeçar të plotë që nga shpallja e pavarësisë së Kosovës në vitin 2008.
