Ministri i Shtetit për Rindërtimin, Arben Ahmetaj, dha detajet më të fundit përsa i përket procesit të rimëkëmbjes.
Ai u shoreh se javën që vjen do të shpallet gara ndërkombëtare për 3400 banesa dhe 4 mijë familje do ta festojnë vitin e ri 2021 me shtëpi të re.
Përsa i përket shtëpive individuale, ministri sqaroi se do të ndërtohen me teknologji të mirë, për t’i rezistuar tërmeteve deri në 9 ballë.
“Javës që vjen shpallet gara ndërkombëtare për 3400 shtëpitë. Do të ftojmë kompanitë ndërkombëtare për të ndërtuar shtëpitë individuale. Do të ftohen ambasadat dhe kompanitë ndërkombëtare për prokurim. Bashkitë kanë nisur vlerësimin e dosjeve individuale. Shtëpitë individuale do të ndërtohen me teknologji të mirë. Rindërtimi do jetë sipas standardit europian, rezistent ndaj tërmeteve deri në 9 ballë. Katër mijë familje që do banojnë në banesat e reja do ta festojnë vitin e ri 2021 në banesat e reja”, tha Ahmetaj.
Ahmetaj bëri me dije se 3400 shtëpitë e para do të ndërtohen me fondin limit prej 73 milion eurosh.
“Jemi gati të nisim në terren nga puna për rindërtimin e 3400 shtëpive të para individuale, që do të financohen nga fondi i rindërtimit. Sot qeveria ka kaluar vendimin për miratimin e fondit limit prej rreth 73 milionë euro, që do iu kalojnë FSHZH dhe Bashkisë së Tiranës. FSHZH do ketë fond prej 6.28 miliardë lekë me zërin, shpenzime kapitale për financim të brendshëm. 2500 shtëpi do të ndërtohen nga FSHZH. Do ketë shtëpi 1+1, 1+2 dhe 1+3”, vijoi Ahmetaj.
