Në qytetin e Delvinës do të vendoset një skulpturë bronxi e aktores së madhe Hajrie Rondo, e cila ndërroi jetë 3 vite më parë.
Lajmi u bë i ditur nga kryetarja e bashkisë së Delvinës, Majlinda Qilimi, e cila thekson se “e ndërsa në sheshin qendror të qytetit qëndron hijerëndë e madhështor, Sulejman Delvina, një tjetër figurë pret të hijeshojë e të lartesojë sheshin pranë kinoteatrit të qytetit. Delvinës do t’i rikthehet serish bija e saj Hajrie Rondo, këtë herë jetësuar në bronx”.
Hajrie Rondo lindi më 1 mars 1951 në Delvinë. Ajo interpretoi në të gjitha gjinitë. Rondo luajti rreth 120 role në teatër dhe rreth 40 role në filma, mes të cilëve mund të përmendim filmin tepër të njohur për shqiptarët “14 vjeç dhëndër”. Aktorja e njohur e kinematografisë shqiptare, Hajrie Rondo, ndërroi jetë në moshën 66-vjeçare në 9 shtator 2017.
