Mbrëmjen e sotme një ngjarje e bujshme tronditi qytetin e Peqinit, ku mbeti i plagosur 31-vjeçari Besmir Hakballa.
Hakballa është një person i njohur për drejtësinë, pasi figuron si person me precedentë të shumtë penalë si vjedhje, grabitje, trafik narkotikësh, ndërsa babai i tij punon si elektricist në bashki.
Sakaq, ai ka qenë i përfshirë në një atentat që ka ndodhur në vitin 2008, në bulevardin në qendër të Peqinit, ku Hakballa, së bashku me dy miqtë e tij, Gazmend Lluca, 19 vjeç dhe Emiliano Hoxha, 19 vjeç, tentuan të vrisnin Astrit Kateshin, vëllai i ish-deputetit të Partisë Socialiste, Edmond Kateshi.
31-vjeçari është dhëndri i Dritan Kateshit, i dënuar me burg përjetë, një nga eksponentët kryesorë të bandave të rrezikshme të Elbasanit gjatë trazirave të 1997.
Së fundmi, Dosja.al ka siguruar foton e Besmir Hakballës, i cili ka postuar një selfie nga spitali i Traumës, ku po merr ndihmën mjekësore.
Në foton e postuar nga vetë Hakballa, bie në sy edhe çarçafi i gjakosur, por 31-vjeçari është në gjendje të mirë shëndetësore.
Foto e publikuara nga Hakballa
Kujtojmë se autori i dyshuar është Adriatik Mezjani, person me precedentë penale, i cili para disa muajsh ka qenë objektiv i një atentati me armë zjarri, por ka shpëtuar.
Po ashtu, në vitin 2011 Mezjani ka tentuar të vrasë me armë zjarri shtetasin Hysen Malkja.
Aktualisht, Mezjani ndodhet në arrati, teksa Policia është vënë në kërkim të tij.
