Kryeministri Rama i është përgjigjur homologut kosovar Ramush Haradinaj pas deklaratave të këtij të fundit se ai dhe Thaçi i kishin bërë presion që të hiqte taksën në Samitin e Berlinit.
Nëpërmjet një shkrimi të gjatë, Rama shkruan se në fakt udhëheqësit nuk i komentojnë në publik bisedat mes tyre, ndërsa ka theksuar se Haradinaj gënjen publikisht për të dalë si ‘burrë i mirë’ para popullit.
“Si rregull udhëheqësit nuk i komentojnë në publik bisedat mes tyre e sidomos ato informale, aq më tepër pa rënë dakord paraprakisht dhe lërë pastaj t’i shtrëmbërojnë, duke gënjyer për të dalë “burra të mirë” para popullit të tyre, si të ishin duke shitur mish në pazar. Më vjen sinqerisht keq që miku im Ramush, nuk e ka mësuar ende këtë rregull kaq të thjeshtë, megjithëse normalisht ky s’është as ndonjë rregull udhëheqësish në fakt, po një normë elementare mirëkuptimi njerëzor. Nuk është hera e parë që e bën, po është hera më e gabuar dhe prandaj këte herë, s’e kaloj dot në heshtje si të tjera.”-shkruan Rama.
Rama shton më tutje se ai ka ndërhyrë në “dy momente” kur Merkel e Macron i kanë thënë Ramush Haradinajt që të japë pëlqimin për pezullimin disa mujor të taksës në mënyrë që dialogu Kosovë- Serbi të hyjë në hullinë e duhur, përfshi këtu edhe me ndërhyrjen direkte të Kancelares dhe Presidenti Francez.
“Kancelarja Merkel dhe Presidenti Macron, kanë nxitur një diskutim informal në holl mbi rifillimin e dialogut. Kam ndërhyrë vetëm njëhere, duke thënë se ata duhet te hynin vetë në proces. Më tutje i kanë kërkuar më shumë durim dhe disa herë Ramushit jo ta heqë taksën, po thjesht të japë pëlqimin që taksa të pezullohet përkohësisht, për 6 muaj apo edhe për 4 muaj qoftë, duke u zotuar që të hyjnë në procesin e dialogut Kosovë-Serbi ata vetë. Edhe të dy personalisht, kancelarja dhe presidenti!
I kam sugjeruar Ramushit në dy momente ta pranojë këtë kërkesë të tyre, sepse kam menduar dhe mendoj që përfshirja direkte në nivelin më të lartë e Gjermanisë dhe Francës, boshtit të Bashkimit Europian, u shfaq si një mundësi e re dhe shumë e favorshme për ta shtruar çështjen e finalizimit të dialogut, në nivelin më të lartë të mundshëm.”
“E kam mbështetur dhe e mbështes edhe sot taksën si një “klithëm” të Kosovës, që ta dëgjojë bota dhe si të tillë edhe e kam mbrojtur, kudo e me këdo. Po une di që ajo është nje taksë që i është vënë Serbisë, jo një mur që i është vënë Gjermanisë, Francës apo SHBA-së, për t’i ndaluar ta ndihmojnë e ta mbështesin Kosovën, në rrugën e përpjekjes së mundimshme historike drejt njohjes përfundimtare nga gjithë bota.”-shkruan Rama.
