Kreu i Partisë Demokratike, Sali Berisha, ka lënë ambientet e Prokurorisë së Posaçme, ku pas daljes zhvilloi një deklaratë për mediat. Ai akuzoi kryeministrin Edi Rama se ka ushtruar presion ndaj Gjykatës Kushtetuese në lidhje me çështjen e Belinda Ballukut.
Sipas Berishës, vendimi i Gjykatës Kushtetuese për rikthimin në detyrë të Ballukut i ka dhënë “zemër” kryeministrit Rama, duke mbyllur çdo mundësi reale për hetimin e ministrave. Ai tha se pas këtij vendimi, organet e drejtësisë janë privuar nga e vetmja masë që mund të aplikohej në raste të tilla, pezullimi nga detyra.
“Rama i tmerruar e mbajti të fshehtë dhe e nxori të nesërmen e vendimit antikushtetueses. Kjo i dha zemër Ramës. Pas vendimit të GJK mbyllet çdo mundësi të hetohen ministra. Ai mori garanci për këtë. Nëse nuk ka pezullim, imunitetin dhe arrestimin nuk e lejon kurrë. Ajo masë që u kishte ngel në duar Prokurorisë, ishte pezullimi në rastin e ministrave dhe këtë pasi parti GJK deri në tjegulla e bllokoi. Një akt si ky nuk ka ndodhur”, theksoi Berisha.
