Kreu i Partisë Demokratike, Lulzim Basha me anë të një statusi në rrjetet sociale ka reaguar lidhur me ndihmën që i ofroi Bashkimi Europian vendit tonë, i cili aktivizoi Mekanizmin e Mbrojtjes Civile.
Kreu i PD-së e ka cilësuar këtë një lajm të mirë përball një momenti kritik që ndodhet vendi ynë. Ai i ka shprehur mirënjohje BE-së , për ndihmën.
“Aktivizimi i Mekanizmit të Mbrojtjes Civile nga Bashkimi Europian për Shqipërinë dhe vendet e rajonit, është një lajm shumë i mirë në këtë moment kritik të përballjes me zjarret. Mirënjohje Bashkimit Europian për ndihmën, përherë një mik i mirë në kohë të vështira 🇦🇱🇪🇺”, shkruan Basha.
Kujtojmë se BE do t’i ofrojë Shqipërisë dy helikopterë për të ndihmuar në shuarjen e zjarreve. Sjellim në vëmendje se vendi ynë prej ditësh tashmë ndodhet në “pushtetin e flakëve “ dhe ditën e djeshme zjarri përparoi në zonat e banuara ku humbi jetën edhe një person në fshatin Asim Zeneli në Gjirokastër. Më herët kryetari i PD-së, Lulzim Basha ka shprehur mirënjohje për punën e bërë nga punonjësit e emergjencave civile dhe forcat e ushtrisë që po përballen me flakët përgjatë këtyre ditëve. Gjithashtu ai ka hedhur akuza ndaj kryeministrit të vendit Edi Rama se ai i heq përballjes me zjarrin helikopterin e ushtrisë, për ta përdorur për udhëtimet e tij.
