SPAK arrestoi ditën e sotme kryebashkiakun e Lushnjës, Fatos Tushe, si edhe 11 punonjës të tjerë të institucioneve, me akuzën e korrupsionit. Tushe ishtë në mandatin e tretë të drejtimit të Bashkisë së Lushnjës dhe nuk vjen për herë të parë në vëmendjen e publikut.
Më 31 dhjetor të vitit 2019, pak muaj pasi Tushes u vu në krye të Bashkisë Lushnje, pas zgjedhjeve lokale të 30 qershorit, ku mori pjesë vetëm Partia Socialiste. Gëzim Saraçi, ish-shoferi i kryebashkiakut Tushe, pas muajsh në konflikt me Tushen u paraqit në zyrën e Bashkisë dhe në ditën e fundit të vitit 2019 hodhi granatën. Granata shpërtheu poshtë tavolinës, dhe ajo që mbeti e plagosur ishte sekretarja e Tushes, Erisa Qalliu. Vetë kryebashkiaku, që ishte edhe shënjestra e atentatit, shpëtoi paq.
Operacioni i RENEA-s erdhi pas zbulimit të aferës korruptive me ndërtimin e një kanali vaditës, projekt me vlerë 24 milion lekë. Sipas SPAK, kryebashkiaku Tushe në bashkëpunim me të tjerë, ka abuzuar me këtë tender duke përfituar shuma të mëdha financiare.
U patën paralajmëruar ndryshime të mëdha dhe goditje të korrupsionit ditë më parë, nga kryeministri Edi Rama dhe Ministri i Brendshëm, Bledi Çuçi. Gjithashtu, edhe ambasada amerikane në Shqipëri i ka bërë jehonë luftës kundër korrupsionit. Lëvizjet e mëdha kanë filluar, me arrestime, pezullime nga detyra dhe me transferime të zyrtarëve të lartë në të gjitha fushat. Gjykatës, Prokurorë, policë të thjeshtë por dhe drejtorë, nuk do të jenë më të qetë në karriket e tyre, duke shfrytëzuar postin.
Këto zhvillime pozitive të ditëve të fundit, po na japin shpresë se Shqipëria po shkon drejt përmirësimit dhe po bën hapat e duhur që të zhdukë korrupsionin dhe abuzimin me detyrën. Shqiptarët tashmë, shpresojnë se kjo punë e mirë deri më tani të mos ndalet me kaq, por të ndëshkohen të gjithë ata që bëjnë veprime të paligjshme duke shfrytëzuar pozicionet që kanë.
