Mikel Alia është i arrestuari i vetëm për vrasjen e Eri Zefit në Zallë Xhuxhë të Fanit në Mirdite.
Alia ishte shok fëmijërie me Zefin dhe akuzohet se e ka nxjerrë në pritë te gjaksit.
Ditën e djeshme ai u dërzua në polici, pasi ishte shpallur në kërkim prej kohësh.
Në dëshminë e tij përpara grupit hetimor, Alia ka dhënë një version tjetër për ngjarjen.
Ai është shprehur se ka qenë duke udhëtuar me mikun e tij, kur dy persona të panjohur i kanë sulmuar në tentativë për t’i grabitur, shkruan “Panorama”.
Ai thekson se autorët donin ta vrisnin dhe atë, por ka arritur të shpëtojë.
“Kam qenë duke udhëtuar me Eri Zefin, por nuk e kam nxjerrë në pritë për ta ekzekutuar.
Kanë dalë për të na grabitur dhe kanë dashur të më vrasin dhe mua”, mësohet të jetë shprehur 40-vjeçari.
Mirëpo hetimet e Prokurorisë vërtetojë plotësisht të kundërtën dhe gjykata ka vendosur ta lërë në burg.
Eri Zefi prej kohësh kishte reduktuar lëvizjet, nga frika e një gjakmarrjeje të mundshme, pasi vëllai i tij në Durrës, kishte vrarë komshiun.
Ka qenë telefonata e mikut të tij të fëmijërisë që e nxorri nga shtëpia për herë të fundit.
Dyshihet se autorët, të cilët e dhunuan dhe më pas e ekzekutuan me 6 plumba, janë arratisur drejt Kosovës dhe më pas në Gjermani.
Autoritetet shqiptare ndërkohë janë duke pritur përgjigjen nga pala kosovare, pas letrës së porosisë.
