Monika Kryemadhi duket se nuk trembet nga Reforma në Drejtësi, pasi sipas saj i ka duart e pastra. E ftuar në emisionin “Të Pa Ekspozuarit”, Kryemadhi është shprehur se Rama nuk ka asnjë mjet dhe provë që ta çojë në burg atë, por veten e tij po.
Kryemadhi ka thënë e bindur se nuk ka firmosur asnjëherë kundër sanksioneve dhe parashikimeve ligjore, por Rama të tregojë kujdes, pasi do të mbytet në zullumin që ka bërë.
Si çdo herë, Kryemadhi nuk i ka kursyer ofendimet ndaj kreut të shtetit, por këtë herë palë me të ka bërë edhe disa nga ish-amabasadorët, të cilët sipas saj kanë ikur me xhepat e fryrë duke përmendur këtu, ambasadoren e BE, Romana Vlahutin.
“Mua s’më çon dot në burg se nuk kam firmosur në jetën time. Tani unë po iu them: Le t’i marrë Edi Rama dhe t’i fus të gjithë në burg. Nuk ka bir nënë që do ta shpëtojë Edi Ramën në zullumin ku ka rënë. Edi Rama do të rrëzohet edhe nga opozita, sepse ka një disavantazh të madh. Disa ambasadorë janë tallur me Shqipërinë, ikën me xhepa të fryrë. Shkoni verifikoni Romana Vlahutinin.
Për mua njëherë është një demagogji. Reforma ka rënë. Reforma në drejtësi ka vetëm një zgjidhje. Ajo është largimi i Edi Ramës. Kjo reformë ka dështuar, sepse nuk po gjen prokurorë dhe gjyqtar dhe do ta kthesh këtë si një dyqan”, tha ajo.
