Seanca e sotme e Kuvendit është shoqëruar me debate mes ministrit të Brendshëm, Sandër Lleshaj dhe deputetit të opozitës së re, Halit Valterit.
Ky i fundit i kërkoi llogari ministrit Lleshaj për rritjen e shkallës së kriminalitetit në vend.
Në fjalën e mbajtur në foltore Lleshaj ka kundërshtuar Valterin, duke thënë se ka një ulje galopante të shkallës së krimit në vend.
Deputeti Halit Valteri e fokusoi debatin tek atentati i prokurorit Arjan Ndoja.
Ky i fundit u shpreh se babai i Andi Malokut, kërkon drejtësi.
Ai tregoi më tej detaje për atentatin, ku u shpreh se në makinë kanë qenë 2 vrasës dhe se ka sekuestruar kamerat e bizneseve.
Lleshaj iu përgjigj se këto prova duhet t’i dorëzojë në Prokurori.
Nga ana tjetër, kryeministri Edi Rama ka mbajtur fjalën e tij në foltore duke mbrojtur ministrin e Brendshëm Sandër Lleshaj.
Rama ka theksuar se ministri nuk është as hetues, as prokuror dhe se policia është e pavarur në punën që bën, duke e cilësuar shumë profesionale dhe të pavarur.
“Zerimi i vëllavrasjes është një përrallë pa mbret sepse nuk ka asnjë vend demokratik që të ketë zëruar vrasjet.
Nuk ka asnjë vend demokratik, edhe vendet më të zhvilluara e më të sofistikuara nuk i kanë zëruar as vrasjet, as trafiqet, as kriminelët, as policët e korruptuar.
Nuk i kanë zeruar.
Jo shumë larg në kohë por pak kohë më parë drejtori i policisë i një prej vendeve që rankohen më lart prej vitesh, Finlanda me kriminalitet të ulët e korrupsion thuajse zero doli se për vite e vite kishte bashkëpunuar me krimin.
Unë besoj që fakti që gjatë qeverisjes sonë janë në numër të konsiderueshëm policët që janë arrestuar, janë çuar për hetime penale, janë pezulluar nuk tregon bashkëpunim me krimin, nuk tregon një fakt si ai që përshkruani ju por tregon të kundërtën, vullnet e angazhim për të luftuar qoftë përballë, qoftë brenda vetes.
Duhet ta lexoni raport-progresin BE, KE janë monitor të pakorruptueshëm të gjitha proceseve dhe nëse shihni se çfarë thonë për luftën kundër krimit në Shqipëri do shihni ndryshimin e madh me së sotmes dhe të djeshmes.
Nga ana tjetër sot jo dje, sot po ndodh ajo që deri dje ishte e paimagjinueshme.
Po ndodh një proces reformimi rrënjësor në sistemin e drejtësisë, një procesi ndërlikuar, i gjatë dhe me defektet e veta dhe po ndodh ndjekja këmba-këmbës e aseteve kriminale.
Ju flisni këtu për shoferë, për njerëz me kapele, pa kapele, për njërin që doli tek kthesa, ndërkohë që ne jemi parlamenti i Shqipërisë. Këtu nuk flitet kështu.
Sigurisht që është folur kështu dhe flitet por nuk duhet të flitet kështu.
Kjo që tha ministri ndodh sot. Doni nuk doni ju, ministri i Brendshëm nuk është as hetues, as prokuror, as njeriu që mbledh kamerat e ti tregojë Policisë së Shtetit si shihen kamerat.
Policia është e pavarur në aktivitetin e saj profesional”, deklaroi Rama.
