Ditën e sotme Gjykata e Përmetit pritet të jap masat e sigurisë për 31 të arrestuarit në kuadër të operacionit “Mezhgorani“, nga i cili ra në prangat e Policisë edhe botuesi dhe pronari i UET-së, Henri Çili.
Fillimisht ishte parashikuar që seanca të niste në orën 12, por ajo është shtyrë për në orën 13:30 sepse gjyqtarit Dritan Hasani me Betim Shkupin, një prej të arrestuarve, kanë qenë shok klase.
Prokurori i çështjes Asllan Bajrami ka kërkuar 30 minuta kohë dhe për të shqyrtuar nëse kemi të bëjmë me konflikt interesi apo jo.
Ishte vetë Bajrami, ai që kërkoi ndryshimin e gjykatësit pak para se të fillonte seanca, duke vendosur Hasanin në vend të gjykatësit të mëparshëm.
Kujtojmë se Henri Cili akuzohet nga prokuroria e Gjirokastrës për ndërhyrjen te funksionarët e lartë publikë për lirimin nga burgu të dy vëllezërve Aliko, akuzuar për vrasjen e efektivit të policisë Ibrahim Basha, gjatë ndërhyrjes së policisë së shtetit në Lazarat.
Të arrestuarit akuzohen për vepra të ndryshme penale, si: “Prodhimi dhe shitja e narkotikëve”, “Ushtrimi i ndikimit të paligjshëm ndaj personave që ushtrojnë funksione publike”, ‘’Falsifikimi i dokumenteve dhe kartëmonedhave”, “Mbajtja pa leje e armëve të zjarrit dhe lëndëve plasëse”, “Organizimi i lotarive të palejuara”, “Pastrimi i produkteve të veprës penale apo veprimtarisë kriminale”, “Fshehja e të ardhurave”, “Mashtrimi”, Moskallëzimi i krimit”, “Përkrahja e autorit të krimit” dhe “Shpërdorim detyre”.
