Kreu i Bashkisë së Tiranës, Erion Veliaj, gjatë mbledhjes së sotme të Këshillit Bashkiak, prezantoi projektet për 2020-ën.
Ndër to ai përmendi, Teatrin e ri, transformimin e Piramidës, Unazën e Madhe, zgjerimin e Lanës dhe Zonën Ekonomike në Kashar.
Sipas tij, sa herë që në Tiranë ka një projekt madhor, ngrihen çeta individësh, që kundërshtojnë në kurriz të shumicës.
Më tej ai shtoi, se kush pengon projektet, do të ketë fatin e banorëve të Astirit.
“Sot dua ta bëj të qartë se çdokush që pengon zhvillimin do të ketë fatin dhe përfundimin e asaj që ndodhi para pak ditësh te Astiri. Tirana nuk ndalet! Qytetarët duan zhvillimin, duan rrugët, duan Piramidën, duan Teatrin, duan Bulevardin e Ri dhe zhvillimin aty, duan transformim në çdo lagje e çdo cep të qytetit. Askush nuk do të guxojë që të ndalë “orën” e Tiranës”, theksoi Veliaj.
Ndër të tjera Veliaj bëri me dije, se të gjithë autobusat ndërqytetas te Dogana, do të transferohen tek kthesa e Kamzës, ku po ndërtohet terminali i ri.
