Kryeministri Edi Rama ishte i pranishëm ditën e sotme në familjen e Fatmir Gjanës në Durrës, i cili humbi gruan e tij Xhuljetën, nga tërmeti shkatërrimtar i 26 nëntorit.
Fatmiri tregoi momentet e tmerrit gjatë tërmetit, ku ndërsa vraponte për të dalë jashtë, i ishte bllokuar dera.
Ai u nxorr i gjallë pas 24 orësh nga rrënojat, por gruaja e tij nuk ia doli.
Rama i tha Fatmirit, se kur bie tërmet nuk duhet të dalësh kurrë jashtë, ndërsa përmendi edhe një rast kur ka qenë i vogël, teksa babai i tij, Kristaq Rama, e kishte shpëtuar, së bashku me vëllanë tjetër Olsin, duke u mbajtur te dera.
Kryeministri foli për raportin e afërt me të atin dhe episodin kur mori vesh për vdekjen e tij
Shefi i qeverisë tha se asokohe ishte në Paris dhe u detyrua të hiqte vathin dhe mjekrën, për të ardhur në varrimin e të atit.
Më tej ai shtoi, se po atë ditë si për koiçidencë, ishte bërë edhe ministër.
Biseda:
Rama: Nuk duhet të dalësh jashtë, kur bie tërmet. Ishim të vegjël kur ra një tërmet. Më kujtohet, Kristaqi i shkret më kapi mua dhe Olsin te dera.
Gjana: Ky ishte shumë i fortë dhe u këputën katet e para. Katër kate ranë si me rënë një kuti.
Rama i drejtohet djalit të Fatmirit: Më hoqe mallin e vëthit tim. Kam pas vëth edhe unë, e hoqa kur më vdiq babai, isha në Paris, dhe kishim shumë marrëdhënie të afërt, por unë do nisesha të nesërmen se nuk kishte avion, dhe kam ndenjur nga stresi nuk e di se sa orë, kam hequr mjekrën pa shkumë fare, hoqa vëthin dhe u bëra si njeri normal, se më parë quhesha jo normal, dhe erdha për varrimin. Pastaj, ditën e varrimit u bëra ministër, ishte koiçidencë.
Gjana: Dje shkova në punë, më shikonin.
Rama: Duhet të bëhesh i fortë se ke fëmijë. Edhe djali do i bëjë së shpejti, sapo të zgjedhë, kur të zgjedhë, se mesa shoh ka shumë e s’di kë të zgjedhë.
