Zhvillimi më i fundit në lidhje me tragjedinë e ndodhur natën e Vitit të Ri në klubin “Le Constellation” në Crans-Montana është arrestimi i njërit prej bashkëpronarëve të lokalit, Jacques Moretti, shtetas francez. Prokurorët zviceranë konfirmuan se Moretti është ndaluar pasi është konsideruar si rrezik për arratisje, ndërsa hetimet për zjarrin vijojnë.
Zjarri shkatërrimtar i shpërthyer gjatë festimeve la të vdekur 47 persona dhe 116 të plagosur. Shumica e viktimave ishin të rinj dhe nën moshën 20 vjeç, ndërsa tetë prej tyre ishin nën moshën 16 vjeç. Një pjesë e të plagosurve po trajtohen ende për djegie të rënda në spitale në Zvicër dhe vende të tjera evropiane.
Vendimi për arrestimin e Jacques Moretti-t u mor pasi ai dhe bashkëshortja e tij, Jessica Moretti, bashkëpronare e lokalit, u morën në pyetje nga prokurorët në kantonin Valais. Sipas ligjit zviceran, një person nën hetim mund të mbahet në paraburgim deri në vendimin e gjykatës brenda 48 orëve. Të dy dyshohen për vrasje nga pakujdesia, dëmtime trupore nga pakujdesia dhe zjarrvënie nga pakujdesia.
Autoritetet zvicerane kanë bërë të ditur se zjarri u shkaktua nga përdorimi i fishekzjarrëve brenda lokalit. Sipas prokurorisë, bëhet fjalë për pajisje piroteknike jometalike që prodhojnë shkëndija dhe flakë. Dëshmitë e para flasin për një zjarr që u përhap me shpejtësi, duke gjeneruar një sasi të madhe tymi dhe nxehtësi të fortë. “Gjithçka ndodhi shumë shpejt”, thuhet në deklaratën zyrtare të prokurorisë së Valais dhe policisë kantonale.
Hetuesit dyshojnë se flakët nisën kur festuesit e Vitit të Ri ngritën shishe shampanje me fishekzjarre të vendosura mbi to, të cilat ndezën shkumën izoluese akustike në tavanin e bodrumit të barit.
Para arrestimit, Jacques Moretti kishte deklaruar publikisht se ai dhe bashkëshortja e tij janë “të shkatërruar” nga ajo që ndodhi. “Nuk arrijmë të flemë dhe as të hamë. Jemi të gjithë shumë keq”, ishte shprehur ai, duke u zotuar për “bashkëpunim të plotë” me autoritetet dhe duke bërë të ditur se kishin angazhuar edhe avokatët e tyre.
Paralelisht me zhvillimet e fundit, mediat franceze kanë nxjerrë në pah edhe të kaluarën kriminale të Jacques Moretti-t. Sipas raportimeve, ai ka pasur probleme me drejtësinë në Francë, përfshirë raste shfrytëzimi të prostitucionit që datojnë rreth tridhjetë vjet më parë. Po ashtu, ai ka qenë i dënuar dhe ka vuajtur burg në Savojë rreth njëzet vjet më parë për mashtrim dhe rrëmbim personi. Sipas një burimi policor, Moretti aktualisht konsiderohet i çliruar nga ajo që përshkruhet si “hija e kriminalitetit të organizuar”.
Një tjetër element që ka tronditur opinionin publik është fakti se lokali “Le Constellation” nuk kishte kaluar kontrolle sigurie për pesë vite, ndonëse ambiente të tilla duhej të inspektoheshin çdo vit. Kryetari i bashkisë së Crans-Montana, Nicolas Feraud, deklaroi se nuk mund të shpjegojë pse kontrollet nuk ishin kryer për kaq gjatë, duke shtuar se autoritetet lokale do të pranojnë përgjegjësinë dhe se përdorimi i fishekzjarrëve do të ndalohet në lokalet e zonës.
Zvicra ka mbajtur një ditë zie kombëtare për viktimat e tragjedisë, ndërsa ceremonitë mortore për disa prej tyre kanë nisur. Hetimet vijojnë për të përcaktuar përgjegjësitë penale në njërën nga tragjeditë më të rënda të ndodhura në vend vitet e fundit.
