Ministria e Mbrojtjes ka njoftuar se gjatë 24 orëve të fundit në vend janë regjistruar gjithsej 24 vatra zjarri, nga të cilat 6 mbeten ende aktive.
Vatrat janë përhapur në disa bashki, përfshirë Elbasanin, Finiqin, Delvinën, Selenicën, Vlorën, Tiranën, Vorën, Krujën, Hasin, Matin, Malësinë e Madhe, Kurbinin, Korçën, Poliçanin dhe Gjirokastrën.
Situata më problematike vijon të jetë në vendgrumbullimin e mbetjeve në bashkinë Elbasan, ku puna për izolimin e flakëve vazhdon edhe sot.
Gjatë ditës së djeshme, ndërhyrja u fokusua në hedhjen e inerteve dhe kapsulimin e mbetjeve, ndërsa në terren ndodhej edhe një grup ekspertësh për matjen e ndotjes së ajrit.
Ndërkohë, në zonën mes fshatrave Grazhdan dhe Malçan, intensiteti i flakëve ka rënë ndjeshëm. Vatra po monitorohet nga dy automjete zjarrfikëse dhe 6 efektivë së bashku me punonjës të Shërbimit Pyjor.
Në zonën “Sotiran”, midis fshatrave Tragjas dhe Dukat, është raportuar një vatër zjarri në një sipërfaqe me shkurre dhe ferra. Në terren ndodhen efektivë të Shërbimit Vendor të MZSH të Vlorës me një automjet zjarrfikës dhe 3 zjarrfikës që po punojnë për neutralizimin e flakëve.
Në fshatin Bulticë, zjarri ka përfshirë një sipërfaqe me bimësi të ulët, por terreni i thyer ka bërë të pamundur ndërhyrjen me mjete. Puna në këtë zonë do të vijojë gjatë ditës së sotme me mbështetjen e 40 efektivëve të Forcave të Armatosura.
Në zonën malore mes fshatrave Gjinaj dhe Domaj, flakët kanë përfshirë një sipërfaqe me pyll pishe. Era dhe terreni i vështirë po ndihmojnë përhapjen e zjarrit, ndërsa forcat zjarrfikëse vijojnë përpjekjet për ta vënë nën kontroll.
Një tjetër vatër është rikthyer në fshatin Zgërbonjë, në një sipërfaqe me shkurre dhe ferra. Aty po ndërhyhet me dy mjete zjarrfikëse dhe 7 efektivë që janë në terren prej mëngjesit.
Në total, rreth 7 hektarë sipërfaqe janë djegur, kryesisht me shkurre dhe bimësi të ulët. Në tre raste të veçanta, në fshatin Marqinet (Vorë), në rrugën “Perlat Rexhepi” në Tiranë dhe në fshatin Bulgarec (Korçë), flakët kanë përfshirë edhe objekte banimi, duke shkaktuar dëme materiale.
