Një mjegull e dendur mbuloi sot në mesditë bregdetin e Vlorës, duke krijuar një skenë të pazakontë për pushuesit dhe plazhistët në zonë.
Ky fenomen, i rrallë për stinën e verës, u shtri përgjatë një pjese të gjerë të vijës bregdetare, nga Lungomare deri në Zvërnec.
Sipas ekspertëve të motit, mjegulla është rezultat i kontrastit mes temperaturave të larta, që në Vlorë kanë arritur deri në 40°C, dhe niveleve të larta të lagështisë në ajër.
Ndryshimet e menjëhershme në kushtet atmosferike kanë favorizuar formimin e kësaj mjegulle të dendur mbi det dhe brigje.
Pamja e pazakontë ka tërhequr vëmendjen e qytetarëve, të cilët kanë publikuar foto dhe video të momentit në rrjetet sociale, duke shprehur habinë e tyre për këtë dukuri jo të zakonshme në kulmin e sezonit turistik.
Meteorologët kanë sqaruar se mjegulla është një fenomen kalimtar dhe pritet të shpërndahet brenda pak orësh, pa ndikuar në temperaturat e larta që do të vazhdojnë edhe në ditët në vijim.
