Për herë të parë, Shqipëria do të përfshihet zyrtarisht në një nga rrjetet më të rëndësishme të shtigjeve malore europiane.
Bëhet fjalë për shtegun ndërkombëtar E6, një rrugë e njohur për ecje në natyrë, e cila do të kalojë edhe në territorin shqiptar, duke hyrë nga zona e Shkodrës përmes kufirit me Malin e Zi.
Lajmi u bë publik gjatë një takimi të zhvilluar në Elbasan, ku morën pjesë Presidenti i Federatës Europiane të Hiking, Boris Micic, dhe kreu i Federatës Shqiptare të Alpinizmit, Artur Guni.
Micic theksoi rëndësinë e përfshirjes së Shqipërisë në këtë rrjet:
“Pas vendimit për zgjerimin e rrugëve europiane të hiking-ut në Ballkan, kemi përcaktuar që dy prej tyre – E6 dhe E12 – të kalojnë edhe në Shqipëri. Sivjet fokusi është tek rruga E6, dhe kilometrat e parë të këtij shtegu do të realizohen brenda vitit”.
Sipas Artur Gunit, E6 do të zhvillohet në tri drejtime hyrëse dhe dalëse: Shkodër, Qafë-Thana dhe Qafë-Bota.
Ai theksoi se ky shteg do të shndërrojë Shqipërinë në një nyje të rëndësishme për ecjen malore dhe eksplorimin e natyrës:
“Ky shteg do të sjellë turistë të cilët ecin, zbulojnë dhe ndalojnë në çdo qytet apo fshat që përshkon rruga. Është një mundësi reale për zhvillimin e zonave rurale dhe promovimin e potencialit turistik të vendit”.
Përfshirja në rrjetin E6 shihet si një nxitje e madhe për turizmin malor në Shqipëri, duke hapur rrugë të reja për vizitorët aventurierë dhe duke i dhënë vendit një pozicion të ri në hartën europiane të natyrës dhe sporteve të qëndrueshme.
