Shpërndarja e ditëve për urgjencat kirurgjikale në tre spitalet e Tiranës ka krijuar konfuzion dhe kaos mes pacientëve.
Gazetari Osman Stafa, në emisionin “Kafe Shqeto”, tha se kjo situatë ka shkaktuar probleme, pasi qytetarët janë të painformuar për spitalin ku duhet të drejtohen për shërbime urgjente.
Sipas tij, ky sistem i implementuar disa vite më parë kërkon ndryshim, dhe është e nevojshme që Ministria e Shëndetësisë të organizojë fushata më të shumta ndërgjegjësuese.
Situata është mjaft serioze, sepse ka ndryshuar. Nëse në fillim, ditën e hënë, urgjencat kirurgjikale i kishte QSUT, ditën e martë dhe të mërkurë i kishte Trauma, të enjten i kishte ‘Shefqet Ndroqi’, të premte e të shtunë i kishte sërish QSUT, tani ka ndryshuar.
Ka ndryshuar para dy muajsh. Nëse një qytetar ka një dhimbje akute, ka nevojë të hyjë në operacion të menjëhershëm, nëse shkon ditën e martë tek QSUT, do ta drejtojnë tek Trauma. Nëse shkon ditën e enjte, do ta çojnë tek ‘Shefqet Ndroqi’. Nëse shkon tek ‘Shefqet Ndroqi’ të dielën, do ta çojnë tek QSUT. E kuptoni çfarë çmendurie është bërë kjo. Ka qenë ish-ministrja Ogerta Manastirliu dhe ministrja aktuale Albana Koçiu, nuk e di pse se ndryshon këtë urdhër. Ose të paktën bëj fushata ndërgjegjësuese për qytetarët. Mjafton të shkojë një ditë të zotit çdo gazetar tek QSUT dhe do të shikojë atje se sa pacientë shkojnë atje dhe u thonë që ‘nuk është dita jonë, shko tek Shefqet Ndroqi’.
Sepse i kam investiguar mjaft mirë çështjen e urgjencave tek të tre spitalet, kam bërë edhe një shkrim me të dhënat kryesore. Situata është, nuk e di, tha Stafa.
