Policia e Shkodrës ka zbardhur ngjarjen e ndodhur një natë më parë, ku banorët e fshatit Gruemirë u terrorizuan nga të shtënat me armë zjarri.
Dy autorët, të cilët qëlluan fillimisht mbi kamerat e sigurisë të familjes Kurtaj, janë identifikuar dhe shpallur në kërkim.
Pas ngjarjes, tre anëtarët e familjes Kurtaj tentuan t’i ndalonin për t’i pyetur për motivin e qëllimit ndaj kamerave, por autorët janë larguar dhe kanë nisur një ndjekje që ka zgjatur rreth 10 minuta.
Gjatë ndjekjes, ata kanë shtënë me automatik kallashnikov, duke shpërndarë rreth 100 plumba.
Njoftimi i Policisë Malësi e Madhe:
Dyshohet se shkuan për të vjedhur në fshatin Gruemirë por u diktuan nga banorët, gjatë largimit qëlluan me armë zjarri në ajër, Policia zbardh ngjarjen.
Identifikohen dhe shpallen në kërkim dy shtetas, të dyshuar si autorë që qëlluan me armë zjarri.
Vijon puna intensive për kapjen e tyre
Specialistët për Hetimin e Krimeve të Komisariatit të Policisë Malësi e Madhe, në vijim të ngjarjes së ndodhur në fshatin Gruemirë, bazuar edhe në informacionet e siguruara nga inteligjenca policore dhe si rezultat i veprimeve të shpejta u bë e mundur zbardhja e ngjarjes, identifikimi dhe shpallja në kërkim e tyre.
U shpallën në kërkim shtetasit E. V., 22 vjeç, banues në fshatin Hot i Ri dhe R. Z(P)., 27 vjeç, banues në fshatin Shtoj i Vjetër;
Nga veprimet paraprake rezulton se dy shtetasit e mësipërm dyshohet se kishin shkuar për të vjedhur në fshatin Gruemirë por janë diktuar nga tre shtetas banorë të fshatit e të cilët këta dy shtetas kanë debatuar dhe më pas gjatë largimit kanë qëlluar me armë zjarri në ajër.
Vijon puna intensive për lokalizimin dhe kapjen e tyre.
Materialet i kaluan Prokurorisë, për veprat penale “Kanosja” dhe “Mbajtja pa leje dhe prodhimi i armëve, armëve shpërthyese dhe i municionit”.
