Mbrëmjen e djeshme, në Vlorë, ndodhi një atentat me armë zjarri që la të plagosur rëndë 30-vjeçarin Kevin Hajrulla dhe 35-vjeçarin Armand Spahiu. Hajrulla, kushëri i Inez Hajrullës, i njohur si “i forti i Vlorës”, ishte shënjestra kryesore e sulmit.
Aktualisht ndodhet në gjendje kritike dhe është transportuar në Spitalin e Traumës në Tiranë.
Armand Spahiu, i cili ndodhej pranë vendit të ngjarjes duke shitur fruta-perime, mbeti gjithashtu i plagosur.
Sulmuesit, dyshohet të kenë qenë tre persona,një shofer dhe dy qitës, që qëlluan me rreth 30 plumba nga një automjet tip KIA.
Pas sulmit, ata u larguan drejt fshatit Panaja, ku dogjën automjetin, duke lënë brenda tij dy kallashnikovë dhe dy krehëra fishekësh.
Policia ka nisur kontrolle në disa banesa për të kapur autorët, të cilët ende mbeten të paidentifikuar dhe në arrati. Hetimet janë në vijim.
