Eksperti i kriminalistikës, Ervin Karamuço, ka ndarë detaje mbi rrjetin e koduar të komunikimit MATRIX, i çmontuar së fundmi nga autoritetet europiane.
Në emisionin “Now”, ai theksoi se ky shërbim ishte krijuar nga vetë kriminelët dhe u zbulua fillimisht nga autoritetet holandeze në telefonin e një vrasësi të dënuar për eliminimin e një gazetari holandez në 2021.
Karamuço zbuloi se gjatë hetimeve u përgjuan dhe deshifruan 2.3 milionë mesazhe në 33 gjuhë.
Ai tha se MATRIX përdorej gjerësisht nga grupe kriminale shqiptare, përfshirë vrasësit me pagesë, të cilët diskutonin teknikalitetet e atentateve dhe porositë kriminale.
Sipas tij, aplikacioni sigurohej përmes kriptomonedhave, duke garantuar anonimitet për përdoruesit.
Përmes këtij rrjeti, autoritetet kanë zbuluar të dhëna që lidhen me trafik ndërkombëtar droge, trafik armësh dhe pastrim parash, të cilat pritet të ndihmojnë hetime të tjera.
Rrjeti MATRIX funksiononte përmes 40 serverëve të shpërndarë në disa vende, kryesisht në Francë dhe Gjermani, dhe monitorimi tre-mujor i mesazheve ishte rezultat i një bashkëpunimi mes autoriteteve franceze dhe holandeze nën mbështetjen e Europolit.
