Deputetja e Partisë Demokratike, Ina Zhupa, ka ngritur zërin në Parlament për burgosjen e ish-deputetit demokrat, Ervin Salianji.
Zhupa deklaroi se Grupi Parlamentar i Partisë Socialiste duhet të kërkojë falje për atë që ajo e quajti “padrejtësi” ndaj Salianjit, duke theksuar se ai është arrestuar për shkak të denoncimeve të tij kundër maxhorancës dhe për rolin e tij si drejtues i PD-së në qarkun e Elbasanit.
Zhupa tha se Salianji nuk ka firmosur ndonjëherë dokumente që ta implikonin në shkelje ligjore dhe nuk është përfshirë në afera korruptive, duke shtuar se ai gjendet në qeli së bashku me “hajdutët e Rilindjes” për shkak të aktivitetit të tij politik, që kishte ndikuar në qasjen e fushatës publike në Elbasan.
Zhupa e cilësoi burgosjen e tij një akt të motivuar politikisht për të dëmtuar opozitën dhe kërkoi që PS-ja të kërkojë falje për këtë padrejtësi.
Ajo akuzoi Partinë Socialiste se po mban peng jo vetëm Parlamentin, por edhe proceset demokratike në Shqipëri, duke refuzuar t’u japë të drejtën demokratëve që u garanton Kushtetuta dhe Rregullorja e Kuvendit.
