Biznesmeni Ilir Rrapaj ka vazhduar të japë dëshminë e tij para Komisionit Hetimor të Shëndetësisë, duke u përballur me pyetje nga deputetë të ndryshëm, përfshirë Petro Koçin nga Partia Socialiste.
Gjatë seancës, Koçi ka pyetur Rrapajn nëse do të kishte fituar koncesionin e sterilizimit nëse ministri i Shëndetësisë, Ilir Beqaj nuk do të ishte në atë kohë.
Pjesë nga biseda
Petro Koçi: Nëse zoti Beqaj nuk do të ishte ministër dhe zoti Rrjepaj nuk do të ishte zëvendës ministër, do të kishit shanse për të fituar këtë koncesion si bashkëpunim operatorësh?
Ilir Rrapaj: 100% po plus edhe TVSH. Kompania “Sani Service” ka në zemrën e saj një lider ndërkombëtar. Më zgjodhi mua për të qenë pjesë e kësaj historie me 5 yje. Ju e quajtët 5M unë e quaj me 5 Yje. Mendoj që po, absolutisht po.
Petro Koçi: Ju thatë që keni qenë për një kohë të gjatë në Itali. Po të mos ishit një person me lidhje të garantuara qoftë brenda kategorisë së bizneseve, por edhe me autoritete vendore të Umbrias. Po të mos ishit ju një njeri i tillë me këto status dhe njohje, a do mundej zoti Beqaj të futej në lidhej me autoritetet vendore të Umbrias, apo jo?
Ilir Rrapaj: Nuk mund ta parashikoj, nuk mundem dot të jap një përgjigje konkrete.
